‘Dry Run’ Beguna Nentuka Pemujur Vaksin Covid-19 Disadung Ila

HARI TIGA, 3 FEBRUARI 2021

KUCHING: Pengawa ‘Dry Run’ nganjung vaksin COVID-19 ke Klinik Pengerai Belaga di Kapit kena 29 Januari tu tadi beguna bendar dikena nentuka pengawa nyadung vaksin nya ila bejalai enggau mujur.

Direkter Opis Pengerai Nengeri Sarawak, Dr Chin Zin Hing ba penerang media iya kemari madah, ‘Dry Run’ nya nyadika malin nentuka penyelap vaksin nya mengkang -75°c sepemanjai timpuh nganjung ari kilang ngagai menua pesisir.

Ku iya, vaksin ti dikeluarka Kompeni Pfizer nya begunaka endur ti pemadu chelap lalu nyadi siti pekara berat ti deka ditapi maya disadung ila.

Program nya mega ku iya, dikena Opis Menteri Pengerai Malaysia (KKM) beratika pekara ti patut sebedau vaksin disadung selampur menua ila.

Penerang Dr Chin tu dikena nimbal sekeda penemu enggau tanya mensia mayuh kebuah vaksin covid-19 nya diuji dianjung dulu ke Kelinik Pengerai di Belaga.

Kelimpah ari nya, iya nerang, maya ‘Dry Run’ nya mega, vaksin tu enda diuji ba sapa-sapa.-EDISI UKAS

Share

add comment