Perintah Sarawak Ngungkupka RM141.7 Juta Dikena Nyaup Lebih 10,000 Orang Dagang PKS

HARI EMPAT, 4 FEBRUARI 2021

KUCHING: Lebih 10,000 iku orang dagang mit enggau jelan pemesai di sarawak deka ngasaika pengelantang ari inisiatif ti udah diserenih baru ba Pakej Bantu Khas Sarawakku Sayang 5.0 (BKSS 5.0).

Sapit Kepala Menteri, Datuk Amar Awang Tengah Ali Hasan madah, Perintah Nengeri udah ngungkupka agih belanja RM141.7 juta nengah beberapa bengkah program baru nya.

Bejaku ba aum media di Kuching kemari, ku iya, BKSS 5.0 ti dibantai Kepala Menteri kena 21 januari sebedau tu ngembuan tuju deka ngelempungka penanggul Dagang Mit Enggau Jelan Pemesai (PKS) di Sarawak maya betapi enggau pengelekai COVID-19.

“Tu nyengkaum nambahka agih belanja RM50 juta ba Skim Kredit Mikro Sarawak (SKMS), nambah RM22.2 juta ba SKim Pinjaman PKS (SPIKS), ngungkupka RM22.2 juta subsidi ba ‘Targeted Relief and Recovery Faciliti’ (TRRF), subsidi RM2.5 juta ba PENJANA Tourism Financing (PTF), RM20 juta agi ba Program Graduan Ke Aarah Keusahawanan (GERAK) enggau Usahawan Teknikal dan Vikasional (USTEV), RM20 juta ba Program Go Digial Sarawak kelimpah RM2 juta dikena ngaduka Program Latih Digital Marketing,” ku iya nerang.

Iya ti mega Menteri Dagang Entarabansa Enggau Industri Enggau Pemansang Orang Dagang madah, perintah mega bisi ngungkupka agih belanja ngagai orang dagang dikena nyungkakka produktiviti enggau ngerembaika dagang sida bepelasarka digital.

“Ba program tu, Perintah Nengeri ngemendarka belanja RM20 juta dikena ngemujurka Program Go Digital lalu RM2 juta ba Program Latih Digital Marketing.

“Dua bengkah program baru tu deka nyaup orang dagang nyungkakka agi dagang sida nengah chara baru tauka bepelasarka digital,” ku iya madah baru. -EDISI UKAS

Share

add comment