Jaku Tuai Rumah Lebih Agi Ngasi, Nyaup Nagang Pengelekai COVID-19 Di Rumah Panjai

HARI SATU, 8 FEBRUARI 2021

JULAU: Jaku tangkan ari tuai rumah beguna bendar dikena nyaup perintah nagang pengelekai COVID-19 ba rumah panjai.

Kaunsilor ari Ulu Entaih, Gundi Matan madah, kebuah pia laban tuai rumah orang ke dipebasa peranak rumah panjai alai penemu enggau jaku tangkan sida lebih agi ngasi tauka dititihka.

“Nya alai, tuai rumah meseti nemu nama bagi pengawa ke patut diatur sida mai peranak rumah panjai besaup nyeliahka COVID-19 tau berampit di rumah panjai.

“Kitai pechaya peranak rumah panjai mendingka jaku tangkan ari tuai rumah sida,” pia ku iya maya dipinta meri penemu bekaul enggau pengawa tuai rumah nyaup perintah nagang pengelekai COVID-19 ti majak nyadi di rumah panjai maya diatu.

Maya dirandau kena hari Enam tu tadi, Tuai Rumah Nyakin Ganya ari Sungai Bangkit mega madahka iya enggau Komiti Pemansang enggau Pengelikun Genturung Pendiau (JKKK) udah sereta semampai neritka agi atur nagang penatai orang bukai niki rumah sida.

“Kami nemu diatu COVID-19 majak nyadi ba rumah panjai.

“Tu balat ngirauka ati alai kami naka alah nentuka pengawa nagang pengelekai penyakit nya meseti diteritka agi maya diatu,” ku iya sambil madahka sida serumah endang bebendar nentuka pengelikun rumah panjai sida.

Empai lama tu tadi, Kepala Menteri Datuk Patinggi Dr Abang Abdul Rahman Zohari Tun Datuk Abang Openg madahka beberapa bengkah atur udah diteritka nyengkaum ‘lockdown’ di rumah panjai kelimpah ngatur pengawa meresa COVID-19. -EDISI UKAS

Share

add comment