Virus COVID-19 Di Sarawak Ke Diatu Enda Sama Baka Di Menua Bukai

HARI DUA, 9 FEBRUARI 2021

KUCHING: Pansik ba COVID-19 ti benung ngelekai di Sarawak maya tu dipadahka bisi bebida enggau pansik ke digaga bulan Mach nyentuk April taun siti tadi.

Pekara tu diterangka Menteri Perintah Menua Enggau Pengawa Berumah Sarawak, Datuk Seri Dr Sim Kui Hian maya randau nengah aplikasyen zoom ke diatur Chairman Opis Kaunsil Sibu (SMC) Clarence Ting Ing Horh, kemari.

“Keterubah penyakit nya ditemu datai ari wuhan tang maya Kluster Stutong enggau Kluster Keranji Tabuan nyadi bulan siti tadi, pansik ti diaduka Universiti Malaysia Sarawak (unimas) mandangka penyakit nya sebaka enggau iya ke nyadi di Indonesia enggau United Kingdom (UK).

“Taja pia ku iya naka ke diatu empai ditemu pun klinikal penyakit nya nyadi,” pia ku iya madah.

Ketegal nya mega, iya madah, Perintah Sarawak meseti bisi saintis, universiti enggau sida ke ngembuan pengelandik ti ulih ngaga pansik kebuah penyakit nya nyelai enti dibanding enggau menua bukai.

Bekaul enggau Kluster Pasai, Datuk Seri Dr Sim madah, pun pengelekai penyakit nya ari Semenanjung Malaysia lalu bisi mega ari UK.

Tang ku iya, pun virus ari UK ukai bansa B117 ti dipadahka jampat agi berampit ari virus COVID-19. -EDISI UKAS

Share

add comment