Program Nyadung Vaksin Renggat Keterubah Berengkah 27 Februari Tu Di Sarawak

HARI DUA, 16 FEBRUARI 2021

KUCHING: Program meri vaksin di Sarawak deka berengkah diatur kena 27 Februari tu.

Direktor Opis Pengerai Nengeri (JKN) Sarawak, Dr Chin Zin Hin madah, renggat keterubah program tu deka diungkupka ngagai ‘frontliner’.

“Ba renggat keterubah program tu deka diungkupka ngagai bala ‘frontliner’ baka raban pengereja pengawa pengerai, polis, soldadu sereta sida ke bekaul,” pia ku iya madah.

Iya mantaika pekara tu maya aum media COVID-19 di Kuching, kena hari Satu tu tadi.

Dr Zin Hing mega nerang, tiap iku ‘frontliner’ deka diberi dua kali tuchuk vaksin nya.

Nambahka jaku iya, iya madah, palan meri vaksin deka ditambah mayuh agi ba program renggat kedua enggau ketiga nyengkaum ba sepital luar.

Program meri vaksin tu diatur ba 56 bengkah palan pengerai nyengkaum di Sepital Bau, Klinik Pengerai (KK) Singai, Sepital Lundu, KK Stungkor, KK Batu Kawa, KK Jalan Masjid, KK Petra Jaya, KK Sentosa, KK Tanah Puteh, Sepital Besai Sarawak (HUS), KK Kota Samarahan, Pusat Jantung Sarawak, KK Asajaya, KK Sadong Jaya, Hospital Simunjan, KK Ibu dan Anak (KKIA) Simunjan Bandar, Sepital Serian, KKIA Serian, KK Tebakang, KK Tarat, Sepital Sri Aman enggau KK Lubok Antu.

Kelimpah ari nya, Sepital Betong, KK Mid Layar, KK Pusa, Sepital Saratok, Sepital Sarikei, KK Sarikei, KK Bintangor, KK Julau, KK Pakan, Hospital Kapit, KK Kapit, KK Song, Sepital Sibu, KK Jalan lanang, KK Sibu Jaya, KK Selangau enggau Sepital Kanowit.

“Sepital Daro, Sepital Mukah, KKIA Mukah, KK Belaga, KK Sungai Asap, Hospital Bintulu, KK Jepak, KK Tatau, Sepital Marudi, Sepital Miri, KK Bandar Miri, KK Batu Niah, Sepital Lawas, KK Lawas enggau Sepital Limbang bela nyendiaka program meri vaksin ba renggat keterubah tu,” ku iya madah baru. -EDISI UKAS

Share

add comment