RM215,682 Geran MRP Diberi Ngagai JKKK, PIBG, JK Masjid Enggau Tabika Kemas Di Semop

HARI SATU, 22 FEBRUARI 2021

SEMOP: Sepenyampau RM215,682 agih belanja ba Projek Mit Menua Pesisir (MRP) Kaban Kunsil Nengeri (ADUN) Semop, Abdullah Saidol udah diberi ngagai enam Komiti Pemansang Enggau Pengelikun Genturung Pendiau (JKKK), Empat Gerempung Apai Indai Enggau Pengajar (PIBG), empat Komiti Masjid Enggau dua buah Tadika Kemas di Dun Semop.

Agih belanja tu disuaka Abdullah kena hari Minggu tu tadi ba empat bengkah endur iya nya di Masjid Kampung Betanak, Dewan Kampung Penibong, Dewan Kampung Semop enggau Dewan Kampung Serdeng.

Maya dirandau, Abdullah ti mega Menteri Pekara Korporat Enggau UKAS madah, agih belanja nya diberi nitihka peminta ke dianjung sebedau tu dikena ngemanahka perengka guna mensia mayuh kelimpah dikena bebelika kereban ba JKKK enggau komiti masjid.

Pia mega ku iya, agih belanja diberi ngagai pibg dikena nyaup sida nyendiaka kereban belajar baka komputer enggau projektor.

Sekeda ari sida ke nerima iya nya JKKK Rumah Isa (RM50,000), JKKK Kampung Betanak (RM50,000) enggau JKKK Kampung Sedo (RM24,700).

Gerempung ke bukai ti bela nerima iya nya JK Masjid Kampung Betanak, JK Masjid Lama Kampung Bruit, JKKK Kampung Penipah, JKKK Kampung Penibong, JK Masjid Kampung Penibong, JKKK Kampung Penuai, PIBG SMK Semop, PIBG SK Semop, Tabika Kemas Kampung Kut, Tabika Kemas Kampung Sebako, JK Masjid Abu Bakar As-Siddiq Kampung Sebako, JKKK Kampung Serdeng, PIBG SK Kampung Serdeng enggau PIBG SK Telok Gelam.

Berebak enggau tu mega, Abdullah minta PIBG semampai berati lalu madah enggau lengkas enti bisi nembiak ari ruang bilik kurang penatai pemisi suntuk belanja dikena besekula.

Nangkan ke nya, iya disempulang Kaban Parlimen Tanjong Manis, Ir Yusuf Abdul Wahab mega bisi bejalai ngabas beberapa projek program Transformasyen Menua Pesisir (RTP) ba menua nya.

Yusuf maya tu madah, semua 14 PIBG di Parlimen Tanjong Manis deka nerima bantu RM5,000 ungkup ba sekula primeri enggau RM10,000 ngagai PIBG sekula sekondri dikena bejalaika program sida.

Kelimpah ari nya, ku iya, sengkabung idung enggau mulut enggau ‘hand sanitizer’ bela deka diberi ngagai semua nembiak sekula nyengkaum bala pengajar sereta raban ke gawa di sekula di Tanjong Manis. -EDISI UKAS

Share

add comment