85 Pintu Rumah Di DUN Bukit Kota Udah Digagaka PPRMS Sepemanjai Taun 2020

HARI DUA, 23 FEBRUARI 2021

LIMBANG: Program Ngemanahka Rumah Rayat Seranta Sarawak (PPRMS) ari Palan Servis DUN N79 Bukit Kota udah digaga ungkup 85 iku mensia mayuh ba sitak DUN nya sepemanjai taun 2020.

Menteri Muda Pengawa Betanam Betupi Moden, Tanah Adat Enggau Pemansang Kandang Menua Sarawak, Datuk Dr Abdul Rahman Ismail udah datai ngabas tujuh buah rumah ke digaga nengah program nya, kena hari Minggu tu tadi.

Sida ke nerima projek tu iya nya ba Kampung Pahlawan, Kampung Benuas, Kampung Limpaki, Kampung Pabahanan, Kampung Tantaya Baru, Kampung Sungai Poyan enggau Kampung Pengkalan Rejab.

Program ti bekenaka ungkus nyauka RM1 juta tu datai ari geran khas perintah Gabungan Parti Sarawak ke diberi nengah komiti MRP-PPRMS Palan Servis Adun.

Naya tu mega, Dr Abdul Rahman ke nyadi ADUN Bukit Kota bela ngabas projek ngaga baru Dewan Kampung Sungai Poyan renggat keterubah nengah projek Program Transformasyen Menua Pesisir (RTP) enggau ungkus RM250,000.

Kelimpah ari nya, iya bela ngabas projek ngemanahka Dewan Kampung Pengkalan Rejab ke beungkus RM30,000 ari geran Projek Mit Menua Pesisir (MRP) 2020. -EDISI UKAS

Share

add comment