Rayat Anang Nangi Nerima Vaksin COVID-19

HARI DUA, 23 FEBRUARI 2021

KUCHING: Rayat di nengeri tu enda ibuh nangi sereta takut nerima vaksin covid-19.

Menteri Muda Ba Opis Kepala Menteri Pekara Islam Enggau Dbku Datuk Dr Abdul Rahman Junaidi madah, vaksin beguna dikena nagang pengelekai virus penyakit nya.

Ku iya ti mega Kaban Kunsil Nengeri (ADUN) Pantai Damai, perintah udah nentuka atur ti silik ngambika pengawa meri vaksin bejalai mujur.

Bejaku maya bejadika program Wifi Sarawak Multimedia Authority (SMA) Linking Urban Rural & Nation di Kampung Sungai Aur, kemari, ku iya madah, rayat tau ngerejister nama diri ba aplikasyen Mysejahtera taja pan diatu pengawa nya enda ditetapka perintah.

Dr Abdul Rahman mega madah, Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg dipelabaka orang ti dulu deka nerima vaksin nya kena 27 Februari tu.

Berebak enggau tu, ku iya, semua genturung pendiau ba DUN Pantai Damai diatu udah bisi arus internet 24 jam.

Ke pemadu baru iya nya Kampung Sungai Aur ti disambung arus internet nengah Wifi Sma Linking Urban Rural & Nation ari saup SMA. -EDISI UKAS

Share

add comment