Anang Nangi Ngambi Vaksin COVID-19

HARI DUA, 2 MARCH 2021

SRI AMAN: Mensia mayuh di sitak Sri Aman anang irau tauka nangi ngambi vaksin COVID-19.

Menteri Muda Pengintu Pengelantang Pendiau, Komuniti, Indu, Ruang Bilik enggau Pemansang Anak Mit, Datuk Francis Harden Hollis ti mega Kaban Kunsil Nengeri (ADUN) Simanggang madah, Kepala Menteri Datuk Patinggi (Dr) Abang Abdul Rahman Zohari Tun Datuk Abang Openg bisi bela begulai enggau raban Kabinet Nengeri ngambi vaksin nya.

Ku iya, tuchuk vaksin nya likun sepengudah diambi laban raban saintis udah mansik vaksin nya enggau silik.

“Tuchuk vaksin ti diterima raban tuai nengeri enggau raban terabai menua nya mandangka perintah Sarawak endang beamai-amai deka ngemunaska pengelekai COVID-19 lalu tiap iku rayat ulih diberi vaksin nya.

“Tuchuk vaksin tu mega dikena ngeringka agi pengerai tubuh ngelaban penyakit COVID-19 ke benung nyadi ba dunia,” ku iya madah maya ba program vaksinasyen di Sepital Sri Aman, lemai hari Satu tu tadi.

Berebak enggau nya, iya nesau mensia mayuh di sitak Sri Aman ngerejister ngambi tuchuk enda bebayar nya nengah aplikasyen MySejahtera tauka nengah tuai rumah.

Bela bisi datai iya nya, Menteri Muda Nembiak enggau Lumba, Datuk Snowdan Lawan ti mega ADUN Balai Ringin, ADUN Bukit Begunan, Datuk Mong Dagang, Residen Sitak Sri Aman, Indit Bangai, Sapit Residen Sri Aman, Elvis Didit, Direktor Sepital Sri Aman, Dr Hazwani Yusof dan Pegawai Opis Pengerai Sitak Sri Aman, Dr Euphrasia Bari.–EDISI UKAS

Share

add comment