Tuai Rumah, JKKK Di Semilan Rumah Panjai Betong Dipinta Bejalaika ‘Community Policing’

HARI DUA, 2 MARCH 2021

BETONG: Tuai Rumah enggau Komiti Pemansang enggau Pengelikun Genturung Pendiau (JKKK) ba semilan buah rumah panjai di Betong ke diatu benung bejalaika atur ‘lockdown’ dipinta ngaduka pengawa ‘Community Policing’.

Sapit Kepala Menteri, Datuk Amar Douglas Uggah Embas madah, tanggungpengawa sida diatu meseti nentuka peranak rumah panjai nitihka atur operasyen standard (SOP) baka ti udah ditetapka Opis Pengerai.

“Peranak rumah panjai anang mindah kebukai, diau ba bilik diri empu aja maya atur (‘lockdown) tu dipejalaika.

“Kitai deka meda sida nitihka SOP.

“Diatu udah maya iya alai tuai rumah enggau JKKK bejalaika tanggungpengawa sida,” pia ku iya madah.

Iya mantaika jaku tu udah Aum Komiti Penyangga Penusah Sitak (JPBB) Betong bekaul enggau pandemik COVID-19 diatur di Betong, kena hari Dua.

Iya ti mega Chairman Komiti Penyangga Penusah Nengeri Sarawak (JPBNS) madah, Opis Residen deka nerang tanggungpengawa enggau tangkan baru nya ngagai JKKK.

Datuk Amar Douglas madah, sebedau tu bisi sekeda peranak rumah panjai enggai nitihka atur nyengkaum bisi pansut belalai ari rumah ngujungka kes positif COVID-19 nambah.

Berebak enggau tu, iya madahka diri berasai lantang ati enggau pengawa ke udah digaga JPBB Betong dikena napi pengelekai COVID-19.

Tu nyengkaum benung ngaga dua bengkah Pusat Kuarantin dan Rawatan COVID-19 Berisiko Rendah (PKRC) di Spaoh enggau Simpang Layar. -EDISI UKAS

Share

add comment