Abdullah Ngabas Taba Projek, Nyuaka MRP Di DUN Semop

HARI LIMA, 5 MARCH 2021

SEMOP: Menteri Muda Di Opis Kepala Menteri (Pekara Korporat Enggau Unit Komunikasi Awam Sarawak), Abdullah Saidol udah datai bejalaika pengawa ba DUN Semop, kena hari Empat tu tadi.

Maya tu iya ti mega Kaban Kunsil Nengeri (ADUN) Semop bisi ngabas beberapa bengkah projek di Kampung Paloh, Kampung Kedang, Berangan, Kampung Sedau Enggau Kampung Serdeng.

Tu nyengkaum dua bengkah projek Transformasyen Menua Pesisir (RTP) iya ke dipelabaka deka bekenaka ungkus RM450,000 kelimpah bela ngabas tiga bengkah taba projek RTP Kaban Parlimen Tanjong Manis ke beungkus urung RM800,000 enggau dua iti Projek Mesra Rakyat (PMR) Perintah Besai ke beungkus RM1,000,000.

Maya tu mega iya bisi nyuaka geran Projek Mit Menua Pesisir (MRP) RM143,401 ngagai enam Komiti Pemansang Enggau Pengelikun Genturung Pendiau (JKKK) rumah panjai enggau sebuah JKKK genturung pendiau lalu ditangkan dua buah tadika kemas enggau siti Gerempung Apai Indai Enggau Pengajar (PIBG).

Di Berangan, Abdullah bisi berandau enggau bala tuai rumah sentang perambu ngaga projek ngemanahka sistem entali ai ke digaga Opis Entali Ai Enggau Parit (JPS) ke beungkus RM15.5 juta.

Kelimpah ari nya, iya maya tu ngemendarka beberapa bengkah projek digaga ngena belanja MRP nyengkaum projek ngaga baru jalai tebelian ke ditengah lima buah rumah PPRT di Kampung Kedang ke beungkus RM87,000 enggau projek ngemanahka Balai Mensia Mayuh Berangan enggau agih belanja RM30,500. -EDISI UKAS

Share

add comment