JBALB Bintulu Ngatur Program Randau Projek ‘Sarawak Water Supply Grid Programme-Stressed Area’

HARI LIMA, 5 MARCH 2021

BINTULU: Opis Bekal Ai Menua Pesisir (JBALB) Pelilih Bintulu udah ngatur Program Randau Projek ‘Sarawak Water Supply Grid Programme-Stressed Area’ di Balai Mayuh Guna Tr. Lichong Along, Tubau kena hari Tiga tu tadi.

Rumah panjai ba Jalan Bakun tu deka digagaka projek bekal ai beresi JBALB alai projek nya berengkah ari Simpang Bakun ngagai Rumah Martha Bilong ti nyengkaum 63 buah rumah panjai.

Projek ke beungkus RM145 juta nya deka dibagi ngagai dua renggat iya nya masang paip besai ba renggat keterubah lalu ngaduka palan meresi ai enggau tangki ba renggat kedua.

Renggat keterubah deka berengkah bulan March tauka April 2021 lalu renggat kedua belabuh nangkan penemu pelin ngaga tangki ai nya.

Kaban Kaunsil Nengeri (ADUN) Murum, Kennedy Chukpai Ugon, Injinir Ai JBALB sitak Bintulu, Lai Kien Hong, Manijer Jelalong Tubau Action Committee (JTAC), Tr. Lichong Along, Tuai Raban Bansa Tubau, Penghulu Awai Anyie enggau 55 iku tuai rumah ari Labang ngagai Tubau, Jalai Bakun bela sama datai maya randau nya.

Berebak enggau nya, Kennedy Chukpai ngelalau semua sama bela bekerejasama ngemujurka projek bekal ai tu ti ulih meri pemaik ngagai semua.

Iya mega ngenataika jaku terima kasih ngagai Perintah Sarawak kelebih agi Kepala Menteri, Datuk Patinggi (Dr) Abang Abdul Rahman Zohari Tun Datuk Abang Openg ti udah nyaup ngemujurka projek nya enggau Opis Menteri Utiliti Sarawak. –EDISI UKAS

Share

add comment