Kepala Menteri Mai Berita Manah Ngagai Peranak Simunjan

HARI EMPAT, 11 MARCH 2021

SIMUNJAN: Penatai Kepala Menteri  Sarawak, Datuk Patinggi (Dr) Abang Abdul Rahman Zohari Tun Datuk Abang Openg ke Simunjan mai berita manah ngagai peranak pelilih nya pengudah iya madahka Projek Sapat Tanah Tusur Sungai Simunjan deka belabuh digaga baru.

Nitihka penerang, kena bulan November taun nyin kemari, projek ke agi benung digaga nya bisi tejanggal ketegal ai pasang raya.

Lebuh dirandau ba aum media pengudah ngabas taba Projek Sapat Tanah Tusur Sungai Simunjan, Kepala Menteri madah, projek pemansang ngaduka sapat tanah tusur nya beungkus entara RM80 juta nyentuk RM200 juta  lalu dipelaba berengkah taun baru tu ila.

Berebak enggau nya, iya mega madah, pansik silik bekaul enggau gaya tanah enggau teknologi ke  dikena ngaga projek nya deka dikemeratka.

“Pansik saintifik enggau gaya tanah sereta teknologi ke dikena ngaga projek sapat tanah tusur Sungai Simunjan nya deka diperatika dulu sebedau kitai berengkah ngaga projek nya,”

“Kebuah pia, laban projek sapat tanah tusur urung 500 meter pemanjai nya digaga ngena kereban ke badas agi,” ku iya nerang.

Dulu ari tu, Kepala Menteri enggau bala ke bukai datai di Simunjan sebedau ngulu penerang bekaul enggau pemansang ke diatur di Anjung Rehat Simunjan.

Nangkan ke nya, iya dipebasa bejadika Rumah Rehat Sri Simunjan. 

Sama bela datai nyempulang Kepala Menteri iya nya Menteri Dagang Temuai, Seni enggau Main Asal Malaysia ti mega Kaban Parlimen Batang Sadong, Dato Sri Nancy Shukri, Menteri Dagang Temuai, Seni enggau Main Asal, Datuk Abdul Karim Rahman Hamzah, sereta Menteri Muda Dagang Entarabansa enggau Industri, Terminal enggau Pemansang Orang Dagang, Datuk Mohd Naroden Majais.

Kelimpah ari nya Menteri Muda Infrastruktur enggau Pemansang Penyangkai Kapal, Datuk Julaihi Narawi, ADUN Simunjan, Awla Dris, ADUN Sadong Jaya, Aidel Lariwoo, Sekretari Perintah Nengeri Sarawak, Datuk Amar Jaul Samion, Sapit Sekretari Perintah Nengeri Sarawak (Transformasyen Sosio Ekonomi Sarawak), Dato Sri Mohamad Abu Bakar Marzuki mega bisi datai.

Ngalihka lemai, Kepala Menteri bejadika Projek Jiwa Murni di Balai Mensia Mayuh Gedong lalu ditangkan enggau pengawa bejadika Projek Ngemanahka Masjid Al Kawthar, Kampung Gedong.-EDISI UKAS

Share

add comment