Sarawak Ba Penuduk Keterubah Mujur Ngaduka Program Meri Vaksin Covid-19

HARI EMPAT, 11 MARCH 2021

Sarawak Ba Penuduk Keterubah Mujur Ngaduka Program Meri Vaksin Covid-19

BAU: Sarawak ba penuduk keterubah ba pemujur ngaduka program meri vaksin ti diungkupka ngagai raban terabai menua.

Sapit Kepala Menteri, Datuk Amar Douglas Uggah Embas madah, maya aum begulai enggau Menteri Sains, Teknologi Enggau Inovasi , Khairy Jamaludin kena hari Dua tu tadi, iya bisi dipadahka program renggat keterubah di Sarawak nyulut ari nengeri bukai ti mega mandangka pemujur sistem meri vaksin di nengeri tu.

“Kitai diatu ba penuduk keterubah ba pengawa meri vaksin ngagai raban terabai menua.

“Tu mandangka raban enggau sistem meri vaksin di nengeri Sarawak mujur bejalaika pengawa,” pia ku iya madah.

Maya dirandau media udah ke ngabas Bilik Operasyen Atur Mindah Betagang Diteritka (PKPD) Kampung Tringgus di Bau kena Hari Tiga tu tadi, iya mega madah, Sarawak merambu program meri vaksin COVID-19 mujur tembu ujung bulan Ogos ti deka datai.

Ku iya, renggat kedua program nya deka belabuh bulan April alai semua rayat Sarawak ke berumur 18 taun ke atas nyengkaum peranak menua bukai ke diau di nengeri tu baikka bisi pemendar tama tauka nadai endang ditentuka nerima vaksin nya magang.

“Program renggat kedua dilanggur deka berengkah bulan April tu.

“Tu diungkupka ngagai semua rayat Sarawak ke beumur 18 taun ke atas.

“Kelimpah ari nya, peranak menua bukai ke diau ditu baikka sida bisi pemendar diau tauka nadai endang ditentuka nerima vaksin nya,” ku iya madah baru.

Datuk Amar Douglas ti mega Chairman Penyangga Penusah Nengeri (JPBN) Sarawak madah, Kepala Menteri udah ngungkupka agih belanja dikena meli vaksin COVID-19 nyema bekal vaksin bisi penanggul dianjung ngagai nengeri tu.

Naka 10 march 2021, sepanyampau 223,923 dos keterubah vaksin udah diberi ba selampur menua alai Sarawak nengeri ba penuduk keterubah ari nengeri bukai ti mujur meri 28,194 dos lalu ditangkan Selangor (24,211) enggau Kuala Lumpur (20,510).-EDISI UKAS

Share

add comment