Semua ADUN Enggau Kaban Parlimen GPS Ulih Ngena Geran RTP Nyaup Ngaduka Projek Jiwa Murni

HARI EMPAT, 11 MARCH 2021

GEDONG: Semua Kaban Kunsil Nengeri (ADUN) enggau Kaban Parlimen ari Gabungan Parti Sarawak (GPS) ulih ngena geran Projek Transformasyen Menua Pesisir (RTP) nyaup nyemujurka pengawa ngaga Projek Jiwa Murni ba sitak ke dipegai sida.

Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg madah, tiap iku pengari rayat GPS udah diungkupka geran RTP sepenyampau RM5 juta setaun dikena bejalaika projek pemansang ba sitak DUN enggau Parlimen sida.

Ku iya, Projek Jiwa Murni ti diatur Soldadu Darat Malaysia (TDM) nya beguna amat lalu meri pemaik ngagai rayat ke lebih agi pengawa ngemanahka palan endur diau, rumah sembiang sereta ke bukai.

“Aku udah berandau enggau Panglima Soldadu Darat, Jeneral Tan Sri Zamrose Mohd Zain bekaul enggau kerejasama entara perintah Sarawak enggau TDM kelebih agi ba Program Jiwa Murni.

“Perintah Sarawak besedia laban kitai bisi agih belanja ba RTP.

“Tang nya tepulai ngagai pengeransing raban soldadu nyaup ngatur Projek Jiwa Murni,” ku iya madah ba aum media sepengudah Pengerami Bejadika Projek Jiwa Murni Parlimen Batang Sadong ti nyengkaum DUN Gedong, DUN Simunjan enggau DUN Sadong Jaya, kena Hari Tiga tu tadi.

Projek Jiwa Murni Parlimen Batang Sadong nyengkaum 21 bengkah projek ti beungkus RM1.5 juta ari Perintah Sarawak ke udah berengkah digaga kena 15 Februari lalu dipelaba tembu 30 April taun tu.

Kepala Menteri sebedau tu madah, Projek Jiwa Murni ba genturung pendiau nya dikemujurka empat iku pegawai enggau 122 iku ari Pasukan Tiga Skuadron Rejimen Askar Jurutera Diraja sereta raban ke bukai di Sarawak.

Iya nambah, maya tu Perintah Sarawak ngemeranka perambu ekonomi udah pandemik COVID-19 dikena muka peluang ekonomi sereta pengawa puang ungkup rayat Sarawak.

Nangkan ke nya, Jeneral Tan Sri Zamrose Mohd Zain madah, siti ari program ti diperambu deka diadak nyerumba pengerami Hari Soldadu Darat taun tu iya nya Projek Jiwa Murni ti mungkur kerejasama soldadu darat enggau Perintah Sarawak sama nyaup mantu penusah rayat.

“Projek ti udah dipejalaika iya nya ngemanahka rumah sereta perengka guna baka ngaduka jematan, masjid enggau surau, tanah pendam, balai mensia mayuh sereta ke bukai,” ku iya nambah.

Bela sama datai ba pengerami tu iya nya Menteri Dagang Temuai, Seni enggau Main Asal Malaysia ti mega Kaban Parlimen Batang Sadong, Dato Sri Nancy Shukri, Menteri Dagang Temuai, Seni enggau Main Asal, Datuk Abdul Karim Rahman Hamzah, Menteri Muda Dagang Entarabansa enggau Industri, Terminal enggau Pemansang Orang Dagang ti mega ADUN Gedong, Datuk Mohd Naroden Majais, Sekretari Perintah Nengeri Sarawak, Datuk Amar Jaul Samion, ADUN Simunjan, Awla Dris enggau ADUN Sadong Jaya, Aidel Lariwoo.

Panglima Medan Timur TDM, Lt Jen Datuk Mardzuki Muhammad, Panglima 1 Divisyen Infantri, Mej Jen Datuk Dzulkafli Mustapha sereta Panglima 3 Briged Infantri, Brig Jen Datuk Azhar Ahmad mega sama bela datai ba program nya. -EDISI UKAS  

Share

add comment