Dua Buah Rumah Panjai Bejalaika Atur Bepekul Nerima 249 Piket Barang Pemakai

HARI LIMA, 12 MARCH 2021

BINTULU: Opis Pengintu Pengelantang Raban Bansa (JKM) Pelilih Bintulu udah nyuaka bantu 249 piket barang pemakai ngagai peranak Rumah Garena enggau Rumah Musa di Batu 17 Jalai Bintulu-Miri, kena hari Dua tu tadi.

Pegawai JKM Pelilih Bintulu, Taddy Ajin maya tu madah, bantu nya dikena nyaup peranak dua buah rumah panjai nya sekumbang nitihka atur bepekul.

“Ngarapka peranak dua buah rumah panjai tu tan ati enggau penanggul tu lalu nitihka Atur Pengawa Standard (SOP) ari Komiti Penyah Penusah (JPBB) Bintulu enggau Opis Pengerai Pelilih Bintulu.

“Bantu barang pemakai tu disediaka ungkup dua minggu tauka maya Atur Bepekul belabuh ari 8 ngagai 21 March tu,” ku iya madah maya dirandau pengudah nyuaka bantu.

Raban ari Palan Servis Mensia Mayuh sitak Kunsil Nengeri (DUN) Samalaju sama bela nyaup pengawa nganjung bantu nya.

Atur Bepekul tu ti kedua kali dipejalai ba dua buah rumah panjai nya alai keterubah atur bepekul dipejalai kena 2 ngagai 15 Februari tu tadi.–EDISI UKAS

Share

add comment