JKR Matau Projek Ngemanahka Jalai Di Nanga Lua

HARI LIMA, 12 MARCH 2021

TATAU: Opis Kereja Raya (JKR) dipinta matau Projek Transformasyen Menua Pesisir (RTP) Ngemanahka Jalai Simpang Rumah Ngumbang ngagai Rumah Joshua Renang di Nanga Lua di Tatau ngambika tembu enggau lengkas.

Menteri Muda ba Opis Kepala Menteri (Undang-Undang enggau Adat Bumiputera)  ti mega Kaban Kunsil Nengeri (ADUN) Kakus, Datuk John Sikie Tayai madah, pengawa matau tu deka ngelengkas ke agi projek nya tembu nitihka timpuh ti udah ditetapka.

“Projek tu beguna bendar ngagai peranak rumah panjai nyungkakka penatai pemisi sida.

“Peranak rumah panjai enda ibuh agi nengah sungai berangkut barang enti projek nya tembu ila,” ku iya madah.

Iya madah munyi nya maya ngabas Projek Ngemanahka Jalai Simpang Rumah Ngumbang ngagai Rumah Joshua Renang, Nanga Lua, Tatau hari Tiga tu tadi.

Berebak enggau nya, Tuai Rumah Joshua Renang maya dirandau meri jaku terima kasih ngagai Datuk John Sikie ketegal ke udah ngemendarka projek nya digaga.

“Terima kasih ngagai ADUN Kakus Datuk John Sikie ti udah ngungkupka ungkus ti besai ngaduka projek tu.

“Tu deka ngelantangka agi peranak rumah panjai mindah ngereja pengawa sida,” pia ku iya.

Sama datai maya tu iya nya Pemangku Pemesai Pelilih Tatau, Calvin Ligong @ Endawie enggau Sapit Injinir JKR Pelilih Bintulu, Ngu Tie Hua. –EDISI UKAS

Share

add comment