Lebih Sejuta Rayat Sarawak Udah Ngerejister Nama Nerima Vaksin COVID-19

HARI SATU, 15 MARCH 2021

KUCHING: Lebih sejuta iku rayat Sarawak udah ngerejister nama ba Program Imunisasyen COVID-19 ti udah berengkah diatur ari bulan Februari tu tadi.

Menteri Kaunsil Kandang Menua enggau Pengawa Berumah, Dato Sri Dr Sim Kui Hian madah, kenyau ari pengawa ngerejister ba program nya belabih, mensia mayuh ke udah udah ngerejister nama nerima vaksin ba nengeri tu iya nya  1,033,643 iku.

“Ari penyampau nya, 615,208 rayat Sarawak ngerejister nama ba Opis Residen enggau Opis Pelilih ba selampur nengeri lalu 418,435 ngerejister nama nengah aplikasyen MySejahtera.

Dato Sri Dr Sim ti mega Kaban Komiti Penyangga Penusah Nengeri (JPBN) Sarawak nambahka jaku iya madah, iya melabaka urung sejuta iku agi deka ngerejister nama ba program imunisasyen nya.

Ku iya, penyampau nya deka nentuka Sarawak ulih meri vaksin ngagai rayat ditu abis nadai 70 peratus tauka dua juta iku.

Iya mega nangkan rayat Sarawak semampai nitihka atur sama bela nyaup nagang pengelekai COVID-19. –EDISI UKAS

Share

add comment