Ngerejister Nama Ba Program Vaksinasyen Enggau Lengkas

HARI SATU, 15 MARCH 2021

BETONG: Rayat ba nengeri tu lebih agi di Betong dipinta anang mendingka jaku petenah bejai Program Vaksinasyen COVID-19.

Kaban Kunsil Nengeri (ADUN) Saribas, Mohammad Razi Sitam madah, mensia mayuh ti empai ngerejister nama nerima vaksin nya anang sanggu ngerejister diri enggau lengkas.

“Aku ngarap mensia mayuh anang enggau nerima vaksin tu.

“Kitai anang mudah arapka jaku petenah ti ngemaruhka pengeransing perintah Sarawak ngaga program vaksinasyen ngagai rayat Malaysia lebih agi kitai di Betong tu,” ku iya madah maya dirandau ba Program Imunisasyen COVID-19 disempulang ADUN Beting Maro, Razaili Gapor di Balai Mensia Mayuh Panglima Rentap, Betong kemari.

Mohammad Razi mega tepantup ati enggau Opis Menteri Pengerai lebih agi Opis Pengerai Pelilih Betong laban udah mujur ngatur pengawa vaksinasyen.

Berebak enggau nya, Razaili mega madah, tuchuk vaksin nya beguna bendar dikena nentuka pengelikun pengerai mensia mayuh lebih agi sida di Beting Maro.

“Tu sebagi ari chara kitai mai rayat kitai bela ngemeratka pengerai enggau pengelikun ari pengelekai COVID-19 tu.

“Aku pechaya enggau vaksin tu, kitai andal agi enggau pengelikun pengerai diri,” ku iya madah. –EDISI UKAS

Share

add comment