Jematan Sungai Limbang Dipelaba Tembu Oktober 2022

HARI TIGA, 17 MARCH 2021

LIMBANG: Projek Jematan Sungai Limbang ti ngemuntangka pejalai ari Limbang ke Brunei kelimpah ditengah lapan bengkah genturung pendiau di seberai Sungai Limbang diperambu deka tembu bulan Oktober 2022.

Kepala Menteri Sarawak Datuk Patinggi Dr Abang Abdul Rahman Zohari Tun Datuk Abang Openg madah, ketegal projek nya betapi enggau penanggul laun tembu, iya udah ngasuh sebengkah raban ‘taskforce’ ti diarika Brooke Dockyard enggau Opis Kereja Raya (JKR) Limbang nyerenih baru atur kereja nembuka projek nya.

“Aku udah ngasuh siti ‘taskforce’ ti diarika kontriktor iya nya Brooke Dockyard begulai enggau JKR Limbang mutarka pekara tu. Kitai bisi chara baka ni ngaduka penanggul ke nyadi tu.

“Nya alai kitai minta dua bengkah kontriktor ngaduka tauka disebut ‘approach group’ ti deka diatur kontriktor nya empu.

“Ari tu, penanggul laun tembu ulih diputarka nengah tiga bengkah raban ngaduka projek Jematan Limbang ngambika tembu nitihka timpuh ke diperambu,” ku iya madah.

Iya bejaku munyi nya maya nemuai ke Limbang, kena hari Dua tu tadi.

Kelimpah ari nya, Datuk Patinggi Abang Zohari maya tu mega ngemendarka Projek Ngaga Jalai Simpang Bukit Sagan ke Ulu Lubai enggau 13 kilometer pemanjai.

Projek tu deka mai pengelantang ngagai peranak ba empat buah rumah panjai ke besemak kelimpah sekula enggau klinik.

Sama bela datai nyempulang penatai iya maya tu iya nya Sapit Kepala Menteri, Datuk Amar Awang Tengah Ali Hassan, Menteri Utiliti Sarawak, Dato Sri Dr Stephen Rundi Utom, Sapit Menteri Perengka Pengangkut Malaysia, Datuk Hasbi Habibollah, Menteri Muda Betanam Betupi Moden, Tanah Adat enggau Pemansang Kandang Menua Sarawak, Datuk Dr Abdul Rahman Ismail enggau Sekretari Perintah Nengeri Sarawak, Datuk Amar Jaul Samion.– EDISI UKAS

Share

add comment