‘Kuching Old Bazaar’ Palan Meseti Ditapat Alai Nemuai

HARI TIGA, 17 MARCH 2021

KUCHING: ‘Kuching Old Bazaar’ sebengkah palan ti patut ditapatka maya datai nemuai ke Kuching.

Menteri Dagang Temuai, Seni Enggau Main Asal Sarawak, Datuk Abdul Karim Rahman Hamzah madah, palan nya udah mayuh berubah ari 200 taun ke udah.

Maya bejaku ba aum media pengudah bejadika ‘Kuching Old Bazaar’ 2021 di Carpenter Street, Kuching hari Dua tu tadi, iya madah, perintah Sarawak nengah opis menteri iya deka ngangkatka palan nya nyadi palan alai nemuai kelimpah palan lama ke bukai di Kuching baka muzium.

Iya ti mega Menteri Raban Nembiak Enggau Lumba Sarawak ngarapka ‘Kuching Old Bazaar’ ditangkir besai agi nyentuk ngagai Jalai India enggau Jalai Padungan ke nyadi sebagi ari pasar Kuching lama suba.

Bejaku ba mua mayuh dulu agi ari nya, Datuk Abdul Karim madahka diri berasai temegah ati enggau pengeransing Gerempung Komuniti Kuching Old Bazaar nyaga sejarah palan nya.

Bela sama datai Menteri Muda Dagang Temuai, Seni enggau Main Asal Sarawak, Datuk Sebastian Ting Chiew Yew, Sekretari Mendam Opis Menteri Dagang Temuai, Seni enggau Main Asal Sarawak, Hii Chang Kee enggau Presiden Gerempung Komuniti Kuching Old Bazaar, Kapitan Lim Chuan Chan. -EDISI UKAS

Share

add comment