713 Nembiak Nerima Baucer Meli Perengka Sekula Ari Kaban Parlimen Tanjong Manis

HARI EMPAT, 18 MARCH 2021

BELAWAI: Kaban Parlimen Tanjong Manis, Ir Yusuf Abdul Wahab udah nyuaka baucer RM35,650 dikena bebelika kereban sekula ngagai 713 iku nembiak sekula primeri Zon Tanjong Manis ba DUN Kuala Rajang.

Yusuf nyuaka baucer RM50 ungkup siku nya ngagai pengari ari semua sekula ba sebengkah pengerami di Balai Mensia Mayuh Kampung Belawai kena hari Tiga tu tadi.

Bantu tu dikena ngelempungka tating penusah apai indai bebelika perengka sekula anak sida.

Kelimpah ari nya, Yusuf mega udah meri bantu sengkabung idung enggau mulut ngagai 970 iku pengajar, nembiak enggau pengereja pengawa ari lima buah sekula.

Sekula ti diberi bantu iya nya SK Abang Gesa, Belawai, SK Abang Buyuk, Jerijih, SK Abang Galau, Rajang, SK Tanjong Manis enggau SK Bayang, Sebayang.

Yusuf mega ngelalau semua nembiak sekula enggau apai indai seruran nitihka atur pengelikun baikka ari Komiti Penyangga Penusah Nengeri Sarawak tauka raban sekula.

Bantu tu mandangka perintah Sarawak semampai ngemeratka pengelikun nembiak enggau pengajar sereta pemujur pelajar menua. –EDISI UKAS

Share

add comment