Orang Indu Bela Landik Ba Teknologi-Kepala Menteri

HARI EMPAT, 18 MARCH 2021

KUCHING: Orang indu maya hari tu nyengala dipeda udah jauh mansang kelimpah bepengelandik ba pekara teknologi nyerumba ubah dunya.

Nambahka nya ku Kepala Menteri Sarawak Datuk Patinggi (Dr) Abang Abdul Rahman Zohari Tun Datuk Abang Openg madah, raban tu mega besai reti ngagai pemujur enggau penegap ruang bilik.

“Tu udah dipeda kitai alai mayuh kompeni besai ti bepelasarka teknologi diatu betuaika orang indu, reti iya pengidup dudi hari kitai deka meruan sereta deka diasaika sapa-sapa enda ngira indu tauka lelaki,” pia ku iya madah maya bejadi Pengerami Hari Orang Indu Entarabansa 2021 Sarawak (HWA21) ti berambika jaku ‘Choose to Challenge’ ba Wisma Bapa Malaysia kena hari Tiga.

Beduduk ari pekara nya, dikena bejadika juluk ati nyadi nengeri mansang ba taun 2030, iya madah, perintah nengeri randaka pengelandik sereta penemu ke pemadu baru bepelasarka sistem ‘merit’.

“Sarawak diatu benung nyingkang ngelawa ngagai ekonomi digital lalu pengawa kitai bepelasarka sistem ‘merit’.

“Nya alai, maya aku ngaga langgur pemansang ngelawa taun 2030 bepelasarka digital, reti iya ubah jeman tu nyadi mayuh penguji.

“Sida ke mujur iya nya sida ke bisi penemu pemadu baru ti ulih ngubah pengidup kitai dudi hari.

“Ari nya, baikka NGO tauka GLC, enti sida bisi pengelebih ba pekara tu sida mega deka dibai ba ‘policy making’,” ku iya nerang.

Sama bela datai maya pengerami tu iya nya bini iya, Datin Patinggi Datuk Amar Juma’ani Tuanku Bujang.-EDISI UKAS

Share

add comment