Orang Indu Di Sarawak Mengkang Betapi Mayuh Penanggul, Penguji

HARI EMPAT, 18 MARCH 2021

KUCHING: Taja orang indu diatu mayuh tinggi sekula kelimpah bela enda tinggal ba macham bengkah sektor pemansang nengeri tang indu ba Sarawak agi betapi enggau macham bengkah penanggul sereta penguji.

Ku Menteri Pengintu Pengelantang Komuniti, Ruang Bilik Enggau Pemansang Nembiak Mit, Dato Sri Fatimah Abdullah, kebuah pekara tu nyadi bepun ari agi bisi penemu ti nekul jalai orang indu bela megai penuduk tauka ngaul diri ba sesebengkah pekara.

“Bisi bala indu kitai di Sarawak agi betapi enggau penyeranta, penusah ruang bilik tauka mengkang betapi ba isu ngenyati nembiak mit ti majak nyadi maya pengelekai COVID-19.

“Penemu ke enda manah mega nekul pengelebih tauka pengelandik sida ke indu bela enggau ba sesebengkah pengawa.

“Ke batang iya, mayuh penemu orang indu empai tebantai tauka dipending laban bisi nyiping juluk ati orang indu sama bela enggau ngemansangka negeri kitai tu,” pia ku iya madah.

Iya mantaika penemu tu maya Pengerami Hari Orang Indu Entarabansa 2021 Sarawak ti berbaika jaku ‘Choose to Challenge’ di Wisma Bapa Malaysia, kena Hari Tiga tu tadi.

Pengerami tu dipenyadi Kepala Menteri Sarawak Datuk Patinggi (Dr) Abang Abdul Rahman Zohari Tun Datuk Abang Openg.

Nambahka jaku iya, ku Dato Sri Fatimah, taja maya hari tu orang indu dikeandal megai penuduk ke besai tang penyampau sida ba penuduk nya agi mengkang mimit.

Nya alai, iya ngansak tiap iku orang indu di nengeri Sarawak bebendar agi nyungkakka diri baikka ba penemu tauka ba pengelandik.

“Orang indu mega meseti ngembuan penegap diri, berani, liat ati, landik mutar penanggul sereta angkat nitihka singkang ubah dunya digital.

“Ngagai sida ke ngasika diri dichiping, dipenyati, anang enggai angkat lalu tempa awak ba diri empu ngasaika pengidup ti meruan agi,” ku iya madah baru.-EDISI UKAS

Share

add comment