Perintah Sarawak Deka Nyaup Opis Imigresen Ngaga Begunan Di Depot Imigresen Semuja

HARI DUA, 23 MARCH 2021

SERIAN: Perintah Sarawak deka nyaup Opis Imigresen ngaga begunan baru di Depot Imigresen Semuja dikena ngurangka penyekut sida ke ditan dia.

Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg madah, tu mega deka ngurangka penyampau kes positif COVID-19 ti majak nambah ba palan nya.

Kelimpah ari nya, perintah nengeri deka nyaup neritka Atur Operasyen Standard (SOP) ba dia.

“Nyadi seharitu (hari Satu) aku udah mutus deka nyaup ngaga begunan baru ba Depot Imigresen Semuja.

“Begunan tu ila deka endur 10 iku orang ke ditan alai sebedau tu 20 iku sida bekunsika endur.

“Tu deka ngurangka penyekut sereta nagang pengelekai sereta SOP ulih diteritka,” pia ku iya.

Iya madah munyi nya maya aum media udah ke ngabas Depot Semuja kena hari Satu.

Kepala Menteri mega madah, SOP  ti enda bangat terit ba palan nya dipelabaka nyadi sebagi ari kebuah kes positif nambah.

“Nyangka bisi pengawa meresa pengerai RT-PCR enda nitihka SOP ti udah ditetap. Tiap iku orang ke ditan meseti meresa pengerai sebedau dibai ngagai palan nya.

“Pekara ti kedua, nyangka palan endur sida ke kena tan nya sekut,” ku iya nambah.

Penatai iya maya tu bela disempulang Sapit Kepala Menteri, Datuk Amar Douglas Uggah Embas, Menteri Pelajar, Sains, enggau Pansik Teknologi Sarawak, Datuk Amar Micheal Manyin Jawong enggau Menteri Kaunsil Kandang Menua enggau Pengawa Berumah Sarawak, Dato Sri Dr Sim Kui Hian. – EDISI UKAS

Share

add comment