Jematan Batang Lupar Ngemuntang Pejalai Mensia Mayuh Nebing Sungai

HARI TIGA, 24 MARCH 2021

SEBUYAU: Pemansang infrastruktur baka projek ngaga Jematan Batang Lupar deka mai mayuh pemaik sereta penguntung ngagai rayat nengeri tu.

Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg madah, penembu projek nya ngemuntangka pejalai mensia mayuh lebih agi sida ke diau nisi sungai.

Ukai semina nya, ku iya, pemansang tu mega deka ngerandang awak ngepunka pemansang pengawa betanam betupi.

“Nengah pengawa ngaga projek tu, kitai mega ulih muka endur baru tauka pemansang ekonomi rayat baka kebun nanas enggau jagung ti muntang agi dianjung sereta dijual ke pasar nengah jalai ke meruan,” pia ku iya madah.

Iya bejaku munyi nya maya bejadika Pengerami Nasih Tanah projek Jematan Batang Lupar, kena hari Dua.

Ba pekara bukai, Datuk Patinggi Abang Zohari ba aum media nangkan pengerami nya, iya madahka Petroliam Nasional Berhad (PETRONAS) udah madah ngagai iya hari Satu tu tadi bekaul enggau pengawa sida tetemuka dua bengkah palan gis enggau minyak ke baru di Sarawak.

“Ari pekara tu, nitihka Sempekat Komersial (CSA), kitai bisi bagi ba pengawa ngemansangka endur tu nengah PETROS (Petroleum Sarawak).

“Semua tu endang nitihka hak kita baka ba Konstitusyen Perintah Besai,” ku iya madah baru.-EDISI UKAS

Share

add comment