Program Malaysia Prihatin Mai Mensia Mayuh Ngerejister Nama Ngambi Vaksin COVID-19

HARI TIGA, 24 MARCH 2021

MACHAN: Sapit Menteri Pengerai II, Datuk Aaron Ago Dagang enggau Kaban Kunsil Nengeri (ADUN) Machan, Allan Siden Gramong udah ngulu Program Malaysia Prihatin di Dewan Suarah Machan.

Program ke diatur kena Hari Dua tu ngembuan tuju deka mai mensia mayuh bela ngerejister nama ngambi vaksin COVID-19 kelimpah nerangka berita pemadu baru bekaul enggau penyakit nya.

Ba program tu, Allan ngarapka mensia mayuh enda nangi ngambi tuchuk vaksin nya lalu semampai ngemeratka Atur Operasyen Standard (SOP).

Maya tu mega, tuai raban bansa Kanowit ke bisi datai bela bekunsika isu ke bekaul enggau COVID-19 ba menua sida.

Maya dirandau UKAS, Pemantu Pegawai Opis Pengerai Klinik Machan, Audery Mancha madah, semua pengereja pengawa ba klinik nya diatu udah ngambi tuchuk vaksin COVID-19 dos kedua.

“Kami mega nadai ngasaika penanggul bukai ketegal ke udah ngambi vaksin nya.

“Vaksin tu likun sereta patut diambi semua kitai,” ku iya madah.

Sama bela datai, Pemesai Opis Pelilih Kanowit Katherine Lalai. -EDISI UKAS

Share

add comment