Projek RMKS Rumah Nyalau 84 Peratus Udah Tembu

HARI SATU, 29 MARCH 2021

BETONG: Projek Rancangan Memulihkan Koridor Sungai (RMKS) Rumah Nyalau Naing di Muman, Spak, Betong udah tembu 84 peratus naka 10 March 2021.

Kaban Kunsil Nengeri (ADUN) Layar, Gerald Rentap Jabu madah, projek ke beungkus lebih RM1.72 juta nya berengkah digaga 17 Disember 2019.

Iya madah munyi nya maya bejadika Program Berupan beserimbai enggau Hari Ai Sedunya 2021 Pelilih Betong di rumah panjai nya, kena hari Enam.

Berebak enggau nya, Gerald Rentap madah, tuju program ke diatur Opis Entali Ai Enggau Parit Sarawak (DID) nya dikena mai mensia mayuh nemu pemesai reti guna ai.

“Sehari (hari Enam) tu kitai nyambut Hari Ai Sedunya 2021 dikena ngingatka kitai bagi pemesai reti guna ai ngagai pengidup besehari-sari,” ku iya madah.

Kelimpah ari nya, iya nangkan peranak rumah panjai nyaga pemeresi sungai ke lebih agi Sungai Spak ti mega siti ari pun ai ba pelilih Betong.

Nangkan ke nya, iya ngarika Kaban Parlimen Betong, Datuk Robert Lawson Chuat nyuaka chek Projek Mit Menua Pesisir (MRP) ngagai Komiti Pemansang Enggau Pengelikun Genturung Pendiau (JKKK) Rumah Nyalau sereta ngemendarka peminta kipas ngagai 32 ruang bilik dia. –EDISI UKAS

Share

add comment