Sarawak Ulih Nyadi Pengeluar Sayur ‘Brokoli’ Enggau ‘Kembang Kol’

HARI SATU, 29 MARCH 2021

KUCHING : Nitihka pemujur pansik di Palan Pansik Betanam Betupi Semenggok, Sarawak ulih nyadi pengeluar sayur ‘brokoli’ enggau ‘kembang kol’.

Sapit Kepala Menteri Sarawak, Datuk Amar Douglas Uggah Embas madah, ‘brokoli’ enggau ‘kembang kol’ nya ditanam raban pemansik ari Opis Betanam Betupi Sarawak.

Iya nerang, sayur nya manah agi ari ti diimport ari China enggau Australia lalu deka nempa awak ke besai ngagai Sarawak ngemansutka sayur kediri empu sereta enda ibuh ngimport ari menua luar.

“Sayur tu berega bendar lalu kami ngarapka pansik kami tu ulih dipejalai ba sektor peribit,” ku iya.

Maya ngabas Palan Pansik Betanam Betupi Semenggok kena hari Minggu, iya ti mega Menteri Betanam Betupi Moden, Tanah Adat enggau Pemansang Kandang Menua madah, benih ‘brokoli’ nya diambi ari Taiwan enggau Jipun lalu ulih diketau ba hari ke-75 ngagai ke-81 pengudah diterenak.

Nangkan ke nya, benih ‘kembang kol’ diambi ari menua tu empu enggau ari Taiwan lalu ulih diketau ba hari ke-69 ngagai hari ke-90. – EDISI UKAS

Share

add comment