JKKK, Peranak Rumah Panjai Mesti Begempung Penemu Nentuka Pengelikun

HARI DUA, 30 MARCH 2021

MARUDI: Kerejasama peranak rumah panjai enggau Komiti Pemansang enggau Pengelikun Genturung Pendiau (JKKK) beguna dikena nentuka pengelikun enggau pengelantang semua.

Sapit Speaker DUN Sarawak, Dato Gerawat Gala madah, ulah nya mega deka nyadika pelasar ngagai pemujur menua majak mansang.

“Komuniti Policing ti udah diterangka ngagai JKKK sebedau tu mega siti ari pengawa nentuka pengelikun.

“Ambika banding, pengelekai COVID-19 dipeda ngansak peranak rumah panjai enggau JKKK besaup nentuka atur operasyen standard (SOP) semampai dikemeratka,” ku iya maya dirandau udah ke nemuai ngagai Rumah Umbar di Sungai Melikat, kena hari Enam.

Ba pengerami nya, Dato Gerawat mega ngungkupka agih belanja RM10,000 dikena ngaga parit rumah panjai nya kelimpah RM10,000 diberi ngagai JKKK enggau RM3,500 ungkup Sarakup Indu Dayak Sarawak (SIDS) Rumah Umbar.

Iya ti mega Kaban Kunsil Nengeri (ADUN) Mulu bisi ngabas Projek Transformasyen Menua Pesisir (RTP) di Rumah Tanjung Stapang B.

Sama bela datai Chairman Opis Kaunsil Pelilih Marudi, Kaunsilor Edward Mendai, Pemancha Randie Bundan, Penghulu Hillary Tawan Acai enggau bala tuai rumah. -EDISI UKAS

Share

add comment