KMKK Meseti Beratika Projek Ke Digaga Di Menua Diri

HARI DUA, 30 MAC 2021

SEMOP: Tuai rumah enggau Tuai Raban Bansa (KMKK) meseti nemu nama bagi sereta beratika projek ke benung digaga ba menua diri.

Menteri Muda ba Opis Kepala Menteri (Pekara Korporat enggau Unit Komunikasi Awam Sarawak) ti mega ADUN Semop, Abdullah Saidol madah, kelimpah ari nya, KMKK patut bisi kaul ke manah enggau ejensi sereta pengari rayat ngambi muntang agi mutar penanggul nyema bisi nyadi.

” Kelimpah ari nya JKKK enggau tuai rumah sereta tuai raban bansa mega patut ngembuan pengelandik dikena mutarka penanggul ke nyadi ba rayat,” pia ku iya madah.

Iya madah munyi nya ba Program Community Engagement Pelilih Daro 2021 Renggat II di Balai Mensia Mayuh Semop kena hari Satu.

Nambahka jaku iya, ku Abdullah, Pulau Bruit diatu benung mansang enggau mayuh bengkah pemansang ti udah diperambu.

Ku iya, proses ngemanahka bekal ai beresi benung digaga laban nya sebagi ari penanggul ke besai di Pulau Bruit.

Ba program ke sama, Abdullah nyuaka agih belanja Projek Mit Menua Pesisir (MRP) sepenyampau RM77,995.

Raban ke nerima MRP tu iya nya JKKK Kampung Bruit (RM1748), JKKK Kampung Betanak (RM2247), Kampung Penibong (RM1000), PIBG SMK Semop (RM16,000), PIBG SK Tekajong (RM54,000) enggau PDK As Safiee Daro (RM3000).

Iya mega nyuaka setipikit ngagai JKKK enggau KMKK ti udah abis timpuh megai pengawa.

Nangkan ke nya, Kaban Parlimen Tanjong Manis, Ir Yusuf Abdul Wahab maya tu bela bisi nyebut bekaul enggau undang-undang ti netapka Yang di-Pertuan Agong ulih ngemendarka darurat digaga.

Iya madah, penyampau kes COVID-19 ba menua tu nyengala nurun sepengudah perintah ngemendarka atur darurat dipejalai.

Iya maya tu ngarika Sapit Menteri ba Opis Kepala Menteri (Pekara Sabah enggau Sarawak), Dato Hajah Hanifah Hajar Taib meri penerang bekaul Program Malaysia Prihatin di Tanjong Manis.

Bisi 46 iku penyereta ari JKKK Pulau Bruit ngambi bagi ba program nya ti diatur nitihka SOP ke udah ditetap. –EDISI UKAS

Share

add comment