KMKK Meseti Nemu Pekara Bekaul Enggau Perintah – ADUN Meluan

HARI DUA, 30 MARCH 2021

JULAU: Tuai Raban Bansa Enggau Tuai Rumah (KMKK) meseti bisi penemu ba pekara ti bekaul enggau perintah sebedau nerangka ngagai rayat.

Kaban Kunsil Nengeri (ADUN) Meluan, Rolland Duat Jubin madah, tanggungpengawa sida beguna dikena bejadika polisi pemansang perintah.

“KMKK megai tanggungpengawa nyadi jematan entara perintah enggau rayat,” pia ku iya madah maya Pengerami Nyuaka Setipikit KMKK Pelilih Julau, kena hari Satu.

Ba pengerami nya, bisi 49 iku udah dichiri nyadi tuai rumah baru.

Kelimpah ari nya, siku penghulu, dua iku kapitan enggau 52 iku tuai rumah nerima setipikit nyambung megai pengawa.

Nambahka jaku iya, ku Rolland, KMKK ulih nyaup perintah nerangka pekara ti betul ngagai rayat dikena nyeliahka runding enda manah ngagai perintah.

Ukai semina nya, ku iya madah, kerejasama KMKK enggau Komiti Pengintu Pengelantang Genturung Pendiau (JKKK) meseti bisi dikena nentuka menua semampai nerima pemansang.–EDISI UKAS

Share

add comment