Orang Berikan Di Lawas Nerima Bantu Injin Sepit

HARI DUA, 30 MARCH 2021

LAWAS: Perintah Sarawak semampai numbuhka macham bengkah chara dikena nyaup nyungkakka pengidup rayat nyengkaum sida ke berikan.

Ketegal nya ku Sapit Kepala Menteri Datuk Amar Awang Tengah Ali Hasan madah, Perintah Sarawak nengah Ejensi Pemansang Adap Utara (NRDA) meri bantu injin sepit ngagai orang berikan.

“Nengah NRDA, kitai nyaup sida ke berikan bisi injin sepit lebih agi ngagai sida ke endang bekenaka bantu tu.

“Ngarapka bantu tu deka ngelantangka agi pengawa sida udah tu ila,” pia ku iya madah.

Iya bejaku munyi nya maya Pengerami Nyuaka Bantu Injin Sepit ba Penyangkai Kampung Noor Islam di Kuala Lawas, kena hari Minggu tu tadi.

Ba pengerami nya, 20 iku orang berikan nerima bantu injin sepit.

Datuk Amar Awang Tengah ti mega Kaban Kunsil Nengeri (ADUN) Bukit Sari madah, beberapa bengkah projek pemansang mega udah dirintai lalu deka digaga nyengkaum ngaga penyangkai semin ti beungkus RM500,000 ba menua nya.

Kelimpah ari nya, Menteri Pemansang Menua Pesisir Malaysia Datuk Dr Abdul Latiff Ahmad ti bisi datai maya tu madah, Menteri Besai Tan Sri Muhyiddin Yasin minta tiap iku menteri Perintah Perikatan Nasional (PN) datai kediri meda nama pemansang ke patut digaga di Sarawak enggau Sabah.

“Tu deka nentuka semua pekara ke dibai ngagai Parlimen ulih dipenyadika kitai,” ku iya madah.

Sama bela datai maya tu iya nya Sapit Menteri Pemansang Menua Pesisir II ti mega Kaban Parlimen Lawas, Dato Henry Sum Agong enggau Menteri Muda Pengawa Betanam Betupi Moden, Tanah Adat enggau Pemansang Kandang Menua Sarawak Datuk Dr Abdul Rahman Ismail sereta bala bukai. -EDISI UKAS

Share

add comment