Lubok Antu Nyadi ‘Pintu Penama’ Dagang Sitak Tengah Sarawak

HARI TIGA, 31 MARCH 2021

LUBOK ANTU: Lubok Antu ngembuan pengelebih nyadi ‘gateway’ tauka pintu penama ‘hab’ dagang besai ba sitak tengah nengeri tu.

Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg madah, kebuah pia laban Lubok Antu ngembuan mayuh penatai ari macham bengkah industri ti ulih nyungkakka ekonomi.

Tu ku iya, diumbaka Lubok Antu semak ba entara Sarawak enggau Kalimantan, Indonesia.

“Aku meda Lubok Antu deka bulih penguntung ari pemansang jalai dagang entara bala kitai ba mengeri enggau Kalimantan, Indonesia enggau Sarawak.

“Nya alai kitai meseti ngemanahka palan penyangkai darat dikena nyungkakka ekonomi ditu lalu Lubok Antu ulih nyadi siti ari ‘gateway’ ekonomi ba sitak tengah nengeri,” pia ku iya madah maya nemuai bejalaika pengawa perintah di Dewan Kompleks Lumba Enggau Main Lubok Antu, kena hari Dua.

Sama bela datai Sapit Kepala Menteri Sarawak, Tan Sri Datuk Amar (Dr) James Jemut Masing, Menteri Muda Pemansang Industri ti mega ADUN Batang Ai, Datuk Malcolm Mussem Lamoh, Kaban Parlimen Lubok Antu, Jugah Muyang enggau Sekretari Perintah Nengeri Sarawak, Datuk Amar Jaul Samion.

Nambahka jaku iya, Kepala Menteri madah, inisiatif nya sebagi ari chara mai ekonomi menua tu pulai manah udah pandemik COVID-19.

“Pemayuh pengawa beranakka puku ila deka dipeda nengah asil ari peluang ekonomi enggau dagang baru entara Sarawak enggau Indonesia ti disungkak enggau pemanah jalai alun enggau arus telekomunikasyen,”ku iya.

Ba pengerami ke sebaka, Kepala Menteri mega madahka sepenyampau RM3 juta agih belanja dikena ngaga lampu jalai ari Pasar Lubok Antu ngelawa Kompleks Kastam, Imigresen, Kuarantin Enggau Pengelikun (ICQS) Lubok Antu.

Ku iya, iya udah minta Opis Kaunsil Pelilih Lubok Antu ngelengkaska agi pengawa ngaga lampu sepemanjai jalai urung 7.5 kilometer nya.

Kelimpah ari nya, iya maya tu ngemendarka projek ngaga jematan ba Tebing Sungai Lubok Antu ngelayang ngagai genturung pendiau seberai.

Dulu ari tu, Kepala Menteri datai di Lubok Antu pukul 10.30 pagi sebedau ngulu pengawa macham bengkah ejensi nerang pekara bekaul ba ICQS Lubok Antu.

Penerang ke dibantai tu bekaul enggau pengeransing perintah neritka pengawa nyaga pengelikun di entara Lubok Antu, Sarawak enggau Kalimantan, Indonesia.

Nangkan ke nya, iya bisi nyuaka bantu pemakai ngagai raban terabai menua ke gawa ba ICQS Lubok Antu.

Udah nya, Kepala Menteri enggau temuai ke dipebasa ke bukai nandu pejalai ngagai Lubok Antu Riverine Park.-EDISI UKAS

Share

add comment