RM4.5 Bilion, 781 Projek Pemansang Ungkup Sarawak Ba RMK-12

HARI LIMA, 2 APRIL 2021

KUCHING: Perintah udah ngemendarka ungkus belanja RM4.5 bilion dikena ngaga 781 iti projek di nengeri Sarawak ba Langgur Pemansang Malaysia Lumpar Ke-12 (Rmk-12).

Menteri Besai Tan Sri Muhyiddin Yassin madah, dalam kandang setaun tu, perintah besai endang bebendar ngaduka pemansang sosioekonomi ba tiap bengkah nengeri nyengkaum di Sarawak.

“Ba langgur renggat keterubah (RP1) 2021 RMK-12, sepenyampau RM4.5 bilion diungkupka ngagai Sarawak dikena ngaga 781 iti projek nengah macham bengkah opis menteri enggau ejensi,” pia ku iya madah.

Iya bejaku munyi nya maya ‘Townhall Wawasan Kemakmuran Bersama 2030’ ke diatur di BCCK, Kuching, kena hari Empat tu tadi.

Ku iya madah, sekeda ari projek pemansang ke benung digaga di Sarawak diatu iya nya Projek Pan Borneo Sarawak, Projek Ngemanahka Padang Bilun Mukah enggau Projek Pemansang Hab Halal Tanjung Manis Fasa 1A.

Kelimpah ari nya, projek ke bukai iya nya program Rumah Mesra Rakyat (RMR) Sarawak enggau projek ngaga sepital di Petra Jaya, Sri Aman enggau Lawas.

Menteri Besai maya tu mega madah, perintah bela ngemeratka pengawa mutarka penyeranta rayat nengah beberapa bengkah program ungkup Bumiputera Sarawak nyengkaum ‘Kluster Native Customary’ enggau Pemansang Ekonomi Baru nengah RP1 2021.

Sama bela datai maya tu iya nya Kepala Menteri Sarawak Datuk Patinggi Dr Abang Abdul Rahman Zohari Tun Datuk Abang Openg, Menteri Kereja Raya Dato’ Seri Fadillah Yusof, Menteri Pelajar Senator Datuk Dr Mohd Radzi Md Jidin, Speaker Kunsil Nengeri Sarawak Datuk Amar Mohamad Asfia Awang Nasar, Tuai Sekretari Menua Tan Sri Mohd Zuki Ali enggau Sekretari Perintah Nengeri Sarawak Datuk Amar Jaul Samion. -EDISI UKAS

Share

add comment