HARI DUA, 6 APRIL 2021
KUCHING: Opis Tanah enggau Survei (JTS) Sarawak mujur nyukat 988,284 hektar tanah naka March 2021 alai 772,102 hektar ari penyampau nya udah digazet.
Direkter JTS, Abdullah Julaihi madah, semua tanah ke udah disukat tu udah tau endur ngaduka pengawa betanam betupi moden ti mega dikena nimbal juluk ati perintah nyungkakka pengawa nya ngelawa tuju nyadi nengeri mansang 2030.
“Ba taun 2021, kitai merambu deka nyukat kelinggi mengkang 53,000 hektar lalu 24,000 hektar pemesai ba kategori tanah siku-siku nyauka dua kali penyampau ari taun ke udah,” ku iya bejaku maya pengerami Pegawai Tanah Enggau Survei Sarawak begulai enggau Kepala Menteri, Datuk Patinggi (Dr) Abang Abdul Rahman Zohari Tun Datuk Abang Openg di Kuching kena hari satu.
Ku Abdullah, pengawa nyukat dipelaba deka chakah agi diatur enggau agih belanja ke diberi Perintah Besai sepenyampau RM21.5 juta ba taun 2021 ditambah enggau RM40 juta ari Perintah Nengeri kenyau ari taun 2019.
Iya nerang, kelimpah nyukat NCR nengah Seksyen 6 enggau Seksyen 18, JTS mega megai tanggungpengawa nyukat tanah ba projek infrastruktur RECODA, URDA, HDA, ISDA sereta opis bekaul ke bukai ditembu enggau mujur.
Tu nyengkaum nyukat jalai, sambung batang paip, projek besai padang bilun Bebuling enggau Bukit Mabong.
Nambahka jaku iya, Abdullah mega madah, beberapa bengkah projek baka Darul Hana, Kampung Datu Sibu, Kemuyang enggau beberapa bengkah projek Skim Gempuru (SPS) enggau Skim Nangkir Genturung Pendiau (SPK) deka chakah digaga ba taun 2021.
“Ba timpuh Langgur Pemansang Malaysia Lumpar Kesebelas (RMK-11) aja, sepenyampau 4,645 lot udah dikemendar nengah SPS enggau SPK.
“Ari 54 projek nya, 36 bengkah projek udah tembu lalu 18 buah projek agi deka diteruska ba RMK-12.
“Kitai melabaka penyampau projek SPS enggau SPK deka nambah nitihka peminta sereta guna iya,” ku iya nambah.
Iya madah, JTS megai tanggungpengawa ke besai nentuka tanah ulih dikena alai ngaga infrastruktur telekomunikasyen.
Abdullah nerang, sepenyampau 300 iti legit telekomunikasyen digaga ba renggat keterubah ditambah 300 agi ba renggat ti kedua sereta 636 legit nengah pelin Jalinan Digital Negara (JENDELA).
Maya pengerami tu, raban Lands Tahai-Q JTS Limbang enggau Innotech Q9 JTS Bintulu nerima anugerah khas ke disuaka kepala menteri.
Raban Lands Tahai-Q nerima Anugerah Emas enggau Anugerah Khas Japan Intellectual Property Association lalu raban Innotech Q9 nerima Anugerah Perak ba Malaysia Technology Expo (MTE) 2021.
Dulu agi ari tu, Kepala Menteri dipebasa bejadika ‘Buku Metamorfosis Evolusi Kualiti Dan Inovasi Jabatan Tanah Dan Survei Sarawak’.
Sama bela datai maya tu iya nya Sapit Kepala Menteri, Datuk Amar Awang Tengah Ali Hasan, Sekretari Perintah Nengeri Sarawak, Datuk Amar Jaul Samion, Menteri Muda Pemansang Mengeri Enggau Pengeraja Asal, Datu Len Talif Salleh enggau Sekretari Mendam Opis Menteri Pemansang Mengeri Enggau Pengaraja Asal, Datu Sr Zaidi Mahdi. – EDISI UKAS
