HARI TIGA, 7 APRIL 2021

KUCHING: Perintah Sarawak deka neruska program nyukat genturung pendiau ba nengeri tu nitihka peminta rayat.

Sapit Kepala Menteri, Datuk Amar Awang Tengah Ali Hasan madah, inisiatif tu dikena nentuka bagi genturung pendiau ti udah digazet nyadi ‘Rizab Komunal Bumiputera’ nyengkaum ke empai digazet.

“Agi mayuh genturung pendiau lama di nengeri tu empai disukat tang taja pia naka ke diatu kitai udah mujur nyukat urung 300 ke 400 buah tanah.

“Tu deka mengkang digaga nitihka peminta mensia mayuh lalu sida iya meseti ngerejister nama ngagai Opis Tanah Enggau Survei,” ku iya.

Iya madah  munyi nya maya dirandau pengudah Pengerami Nyuaka Surat Tanah Seksyen 18 Kanun Tanah Nengeri Kampung Buntal Lama di Dewan Sri Buntal, Kampung Buntal kena hari Dua.

Datuk Amar Awang Tengah ti mega Menteri Pemansang Mengeri Enggau Pegeraja Asal Kedua enggau Menteri Dagang Entarabansa Enggau Industri, Terminal Enggau Pemansang Orang Dagang madah, orang ke bisi ngambi nama ba program nyukat genturung pendiau tu deka diberi surat bempu tanah lalu nadai bebayar.

“Tanah nya deka diempu sida ke bisi surat bempu tanah seagi tanah nya enda dijual,” ku iya.

Lebih 900,000 hektar Tanah Adat Bansa Asal (NCR) Bumiputera di selampur Sarawak udah disukat dikena ngaduka pengawa betanam betupi.

Iya madah ari penyampau nya, urung 760,000 hektar udah digazet.

“Enti bisi peminta nengah chara individu, tanah ke udah disukat kelinggi enggau digazet deka disukat enggau chara nya,” ku iya nerang.

Ba pengerami nya, 155 iku peranak Kampung Buntal Lama diberi surat bempu tanah.

Bela sama datai iya nya Menteri Muda ba Opis Kepala Menteri Pekara Islam Enggau DBKU ti mega Menteri Muda Bekal Ai enggau Kaban Kunsil Nengeri (ADUN) Pantai Damai, Datuk Dr Abdul Rahman Junaidi sereta Menteri Muda Dagang Entarabansa Enggau Industri, Terminal Enggau Pemansang Orang Dagang, Datuk Mohd Naroden Majais. –EDISI UKAS