Perintah Sarawak Chakah Bejalaika Pengawa Nyukat Tanah NCR

HARI TIGA, 7 APRIL 2021

KUCHING: Perintah Sarawak dipegai Kepala Menteri Sarawak, Datuk Patinggi Dr Abang Abdul Rahman Zohari Tun Datuk Abang Openg chakah bejalaika pengawa nyukat Tanah Bansa Asal Bumiputera (NCR).

Sapit Kepala Menteri, Datuk Amar Awang Tengah Ali Hasan madah pengawa tu endang udah berengkah digaga kenyau ari taun 1960 nyentuk ke diatu.

“Kitai udah bejalaika pengawa nyukat tanah NCR kenyau ari taun 1960.

“Kenyau ari taun 1960 nyentuk taun 2010, kitai udah nyukat urung 260,000 hektar tanah,” ku iya.

Iya madah  munyi nya maya dirandau sepengudah pengerami nyuaka Surat Bempu Tanah Seksyen 18 Kanun Tanah Nengeri Kampung Buntal Lama di Dewan Sri Buntal, Kampung Buntal, kena hari Dua.

Ba pengerami nya, 155 iku peranak Kampung Buntal Lama diberi surat bempu tanah.

Datuk Amar Awang Tengah ti mega Menteri Pemansang Mengeri Enggau Pegeraja Asal Kedua madah, pengawa nyukat tanah ba nengeri tu dibagi ngagai dua renggat nengah inisiatif baru.

“Renggat keterubah iya nya nyukat kelinggi nitihka peminta.

“Pengawa nyukat tanah enda digaga nyema bisi sida enggai disukat tanah.

“Kitai deka berandau enggau sida dulu sebedau pengawa nyukat tanah digaga,” ku iya nambahka jaku iya.

 Iya mega madah, perintah Sarawak deka nyaup sida ke bempu tanah nyukat tanah nengah Seksyen 6.

Naka ke diatu, perintah Sarawak udah mujur nyukat urung 980,000 hektar tanah NCR enggau lebih 760,000 hektar tanah udah digazet.

 “Kitai deka meri surat bempu tanah Seksyen 18 Kanun Tanah Negeri lalu nadai bebayar,” ku iya.

Bela sama datai Menteri Muda ba Opis Kepala Menteri (Pekara Islam enggau DBKU) ti mega Menteri Muda Bekal Ai enggau Kaban Kunsil Nengeri (ADUN) Pantai Damai, Datuk Dr Abdul Rahman Junaidi sereta Menteri Muda Dagang Entarabansa Enggau Industri, Terminal Enggau Pemansang Orang Dagang, Datuk Mohd Naroden Majais.-EDISI UKAS

Share
0