Perintah Sarawak Deka Ngaga Pasar Mit Mulu

HARI TIGA, 7 APRIL 2021

MULU: Pasar Mit Mulu ba Pelilih Mit Mulu deka digaga perintah Sarawak ke tau bendar nyungkakka pemansang ba macham bengkah pekara lebih agi ba dagang temuai.

Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg madah, perintah negeri deka ngaduka pelin besai dikena ngamatka juluk ati nya enda lama agi.

Ku iya, perintah Sarawak ngambi projek nya ari perintah besai ngambika pemansang dia jampat agi ngerembai lalu deka pulaika pemaik ngagai peranak menua nya.

“Menua Mulu tu udah tebilang enggau pengawa dagang temuai, nya alai, kita meseti ngaga pelin besai dikena numbuhka Pasar Mit Mulu tu enggau lengkas.

“Tu nyengkaum ngaga opis-opis perintah nengeri enggau perintah besai ditu,” pia ku iya madah maya Pengerami Pemesai Begulai Enggau Rayat di Mulu, kena malam hari Dua.

Kepala Menteri maya tu mega nambah, perintah nengeri besetuju ngaga siti agi blok baru ba skim gempuru Penan di Batu Bungan.

Nambahkanya ku iya, iya bela besetuju enggau penemu deka ngaga Kampung Melinau nyadi kampung digazet.

Berebak enggau tu, iya madah, semua genturung pendiau di Mulu deka diberi bekal karan nengah Skim Bekal Karan Alternatif Menua Pesisir (SARES) taun ti deka datai.

“Perintah Sarawak nengah Gabungan Parti Sarawak (GPS) deka nyediaka pemansang karan enda bebayar nengah SARES tu ngagai rayat di menua pesisir,” ku iya madah baru.

Dulu agi ari tu, Sapit Speaker DUN Sarawak ti mega Kaban Kunsil Nengeri (ADUN) Mulu, Dato Gerawat Gala madah, iya enggau Kaban Parlimen Baram, Anyi Ngau semampai chakah deka meda menua Mulu mansang.

Bela datai ba pengerami tu iya nya Menteri Dagang Temuai, Seni enggau Main Asal Sarawak Datuk Abdul Karim Rahman Hamzah, Menteri Muda Pengatur Kandang Mengeri, Pengatur Tanah enggau Pengeraja Asal, Datu Len Talif Salleh, Menteri Muda Pekara Korporat enggau UKAS, Abdullah Saidol, Kaban Parlimen Baram, Anyie Ngau sereta bala temuai dipebasa ke bukai. -EDISI UKAS

Share

add comment