Sida Ke Bempu Tanah Seksyen 18 Ditangkan Enda Nyual Tanah

HARI TIGA, 7 APRIL 2021

KUCHING: Menteri Muda ba Opis Kepala Menteri (Pekara Islam enggau DBKU), Datuk Dr Abdul Rahman Junaidi ngelalau sida ke udah nerima geran seksyen 18 enda nyual tanah sida.

“Kitai meseti nyaga tanah tu enggau manah ti udah diungkupka kitai enggau diri sebilik.

“Ti kedua, tanah tu nyadi pesaka ngagai rebak baru jemah ila,” ku iya.

Iya madah munyi nya maya pengerami nyuaka Surat Bempu Tanah Seksyen 18 Kanun Tanah Nengeri Kampung Buntal Lama di Dewan Sri Buntal, Kampung Buntal, kena hari Dua.

Iya ti mega Kaban Kunsil Nengeri (ADUN) Pantai Damai madah, genturung pendiau ngelinggi Jalai Sultan Tengah nyengkaum Kampung Buntal deka ngasaika pemansang bepun ari rega tanah menua nya majak niki.

 “Kampung Buntal enggau genturung pendiau sitak Jalai Sultan Tengah ti nyengkaum Kampung Rampangi nyentuk Kampung Santubong deka ngasaika pemansang ke besai berengkah ari diatu nyentuk ke jemah ila.

 “Rega tanah menua deka majak niki seririh enggau pemansang tu lalu nyadi pesaka rebak baru ila,” ku iya nambahka jaku iya.

Bela sama datai iya nya Sapit Kepala Menteri ti mega Menteri Pemansang Mengeri Enggau Pegeraja Asal Kedua enggau Menteri Dagang Entarabansa Enggau Industri, Terminal Enggau Pemansang Orang Dagang, Datuk Amar Awang Tengah enggau Menteri Muda Dagang Entarabansa Enggau Industri, Terminal Enggau Pemansang Orang Dagang, Datuk Mohd Naroden Majais.-EDISI UKAS

Share

add comment