Perintah Nengeri Ngungkup RM90 Juta Ngagai Sarawak Coastguard

HARI EMPAT, 8 APRIL 2021

KUCHING: Perintah Nengeri udah ngungkupka belanja RM90 juta dikena meli kereban ke dikena ‘Sarawak Coastguard’ (SCG).

Kepala Menteri Sarawak Datuk Patinggi (Dr) Abang Abdul Rahman Zohari Tun Abang Openg madah, agih belanja nya udah dipejurai maya bajet 2020 kena 4 November 2019.

“Sehari tu kita ulih meda sebuah kapal enggau enam buah perau laju ke udah tembu digaga iya nya ‘catamaran’ enggau ‘interceptor’.

“Tu dikena kitai negapka agi pengawa nyaga pengelikun kandang tasik Sarawak enggau rampa menua tasik nengeri,” pia ku iya madah.

Iya bejaku munyi nya maya bejadika ‘Sarawak Coastguard’ di kuching, kena hari Tiga tu tadi.

Nambahka jaku iya, Kepala Menteri madah, kereban nya mega tau dikena maya penusah bukai baka ampuh bah.

Nerang enggau silik, iya madahka SCG deka neritka undang-undang nengah Ordinan Nengeri iya nya State Fisheries Ordinance 2003, Forest Ordinance 2015, Wild Life Protection Ordinance 1998, National Parks And Nature Reserves Ordinance 1998 enggau Oil Mining Ordinance (OMO) 1958.

Iya mega madah, pemujur numbuhka ‘Sarawak Coastguard’ kelai perintah Gabungan Parti Sarawak (GPS) ngemeratka pengelikun enggau pengelantang rayat. -EDISI UKAS

Share
0