Miri Mengeri Keterubah Nyadi ‘Smart City’ Di Sarawak, ‘Smart Sarawak’ Ba Taun 2030

HARI SATU, 12 APRIL 2021

MIRI: Miri mengeri keterubah nyadi ‘Smart City’ di nengeri Sarawak.

Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg madah, perintah nengeri milih Miri nyadi chunto ‘Smart City’ ngagai mengeri bukai ketegal ke udah ngembuan sistem arus pemadah ke manah.

Ku iya, pekara nya deka nyadika pelasar nyungkakka macham sektor bekenaka teknologi enggau ekonomi digital.

“Pengawa tu engkeman ke pemadu manah, ke deka nyadika chunto ngagai mengeri bukai di Sarawak alai Miri nyadi mengeri keterubah ‘Smart City’,” pia ku iya madah.

Sama bela datai maya tu iya nya Menteri Perintah Menua Enggau Pengawa Berumah Sarawak, Dato Sri Dr. Sim Kui Hian, Menteri Perengka Pengangkut Sarawak, Datuk Lee Kim Shin enggau Sekretari Perintah Nengeri Sarawak, Datuk Amar Jaul Samion.

Kepala Menteri mega madah, pengawa nempa Miri Smart City Proof Of Concept (MSCP) seririh enggau Sarawak Digital Economy Strategy 2018-2022.

Ku iya nerang, nengah ekonomi digital Sarawak, bisi tujuh batang sektor nyengkaum Smart City ti dikemeratka ba pelin strategik iya ke nyendia servis betikas pemadu manah ngagai rayat.

“Insiatif ke diaduka kitai tu ngembuan tuju dekaka mengeri besai dikemanahka agi ngambika nyadi ‘Smart City’,” ku iya madah baru.

Nangkan ke nya, Kepala Menteri mega madahka konsep ‘Smart City’ deka dikerembai ngagai mengeri besai ke bukai di nengeri tu ba tuju ngelawa juluk ‘Smart Sarawak’ manggai taun 2030.

Iya madah, semua penerang bekaul enggau ‘Smart Teknologi’ deka dipatau ari siti palan nyaga data di Kuching.

Bisi sepuluh batang pekara ba program MSCP iya nya Miri Smart City, Smart Drain, Safe Park, Safe City, Digital Signages, Smart Bus, E-Local Authority2, Miri Cares, Smart Truck enggau Miri Tourism.

Ba pengerami nya, iya mega bejadika ‘Smart Bus’ enggau ‘Smart Truck’ sereta nyuka replika chek ngagai Miri Red Crescent Dialysis enggau Miri Tua Pek Kong Temple. -EDISI UKAS

Share
0