Pejalai Gawa Kepala Menteri Nemuai Ke Balingian

HARI SATU, 12 APRIL 2021

BALINGIAN : Kepala Menteri Sarawak, Datuk Patinggi Dr Abang Abdul Rahman Zohari Tun Datuk Abang Openg udah nemuai bejalaika pengawa perintah ke Balingian kena hari Minggu tu tadi.

Iya madah, Mukah deka mansang enggau mayuh bengkah projek besai udah digaga dalam kandang tiga taun tu.

“Pelilih Mukah deka mansang enggau lengkas.

“Mayuh projek besai udah digaga dalam kandang tiga taun ba Mukah,” ku iya bejaku ba Pengerami Nasih Tanah Anjung Selera Balingian di Balai Mensia Mayuh Balingian.

Datuk Patinggi Abang Zohari nerang, ku iya, projek ngaga jematan  nya sebagi ari pemansang ti engkeman ba pelilih Mukah.

“Jematan tu nyadi kunchi pemansang ba pelilih Mukah.

“Batang Lassa, Batang Paloh, Batang Igan nyengkaum Batang Rajang nyentuk Tanjung Manis.

“Tu reti iya semua Pelilih Mukah udah ulih dilawa nengah jalai alun,” ku iya.

Taba projek ti benung diperati enggau dikemujur ba pelilih Balingian iya nya Ngemanahka Mini Stadium Balingian, Ngaduka Opis Pelilih Mit Balingian, Perambu Ngaga Jematan 2 (Penakub Ulu Mukah), Jalai Telian By-Pass, Mukah, Ngaduka Palan Paking Entukar, Jamban Enggau Landskap Waterfront Pasar Lama Balingian, Medan Selera Metading Extension, Ngemanah Waterfront Pasar Lama Balingian, Projek Rumah Spektra enggau Ngaga Hotel Boutique Balingian.

Maya tu mega, Kepala Menteri Datuk Patinggi Abang Zohari ngemendarka dua perambu projek ti dibantaika Kaban Kunsil Nengeri (ADUN) Balingian, Abdul Yakub Arbi.

Dua bengkah projek tu iya nya perambu Ngaga Chalet sepenyampau RM10 juta enggau Pusat Sehenti Usahawan Balingian ti bekenaka ungkus RM5 juta.

Bela sama datai, Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit, Dato Sri Fatimah Abdullah, Menteri Muda ba Opis Kepala Menteri (Undang-undang enggau Adat Bumiputera), Datuk John Sikie Tayai, enggau Menteri Muda Pemansang Mengeri enggau Pengeraja Asal, Datu Len Talif Salleh. – EDISI UKAS

Share
0