KKM Deka Nambah Mayuh Agi Pengereja Pengawa Opis Pengerai Mantu Ngemunas Covid-19 Di Sarawak

HARI DUA, 13 APRIL 2021

KUCHING: Opis Menteri Pengerai Malaysia (KKM) deka nambah mayuh agi pengereja pengawa pengerai nyengkaum di nengeri bukai dikena besaup ngemunaska pengelekai pandemik COVID-19  di nengeri tu.

Menteri Pengerai Malaysia, Dato Sri Adham Baba madah, pekara tu dikena mutarka penanggul suntuk orang gawa ba proses 3T (Tracing, Testing, Treatment), isolasyen enggau ba  Pusat Kuarantin Dan Rawatan Berisiko Rendah (PKRC).

“Pengereja pengawa pengerai tu iya nya ari zon gadung di Sarawak enggau ari nengeri bukai.

“Urung 300 ngagai 500 iku pengereja pengawa ari macham bengkah kategori baka lutur, misi enggau sida ti ngaduka peresa pengerai,” iya bejaku munyi nya maya dirandau media maya ngabas palan vaksinasyen COVID-19 di Kuching, kena hari Dua.

Kelimpah ari nya, iya madah, urung 2.3 juta iku peranak Sarawak enda nyengkaum 18 taun ke baruh deka diberi tuchuk vaksin COVID-19.

“Perintah Sarawak empu udah mantu mayar ungkus vaksin COVID-19 ungkup rayat,” ku iya.

Ku iya,  Sarawak mega nadai nanggul ngatur palan vaksinasyen tauka Mass Vaccination Centre ti dipejalaika KKM.

Bela sama datai maya tu iya nya Menteri Kaunsil Kandang Menua Enggau Pengawa Berumah, Dato Sri Profesor Sim Kui Hian, Sapit Menteri Pengerai II, Datuk Aaron Ago Dagang enggau Direktor Pengerai Nengeri Sarawak, Dr Chin Zin Hing. – EDISI UKAS

Share

add comment