Perintah Meri Jamin Vaksin Covid-19 Di Sarawak Chukup

HARI TIGA, 14 APRIL 2021

KUCHING: Perintah meri jamin ngagai Sarawak deka nerima bekal vaksin COVID-19 ke chukup dikena nembuka program vaksinasyen nyentuk ujung bulan Ogos tu.

Pekara tu diterangka Menteri Koordinator Program Imunisasyen COVID-19 Menua, Khairy Jamaluddin maya nerima penemuai Sapit Kepala Menteri Sarawak, Datuk Amar Douglas Uggah Embas ba opis iya di Putrajaya, kena hari Satu tu tadi.

Datuk Amar Douglas Uggah nangkan ke nya madah, jamin ari Khairy ti mega Menteri Sains, Teknologi Enggau Inovasyen (MOSTI) nya deka ngelantangka agi pengawa Sarawak nembuka program imunisasyen ti deka diberi ngagai urung 2.2 juta iku rayat nengeri tu nyengkaum peranak menua bukai ke bisi ba Sarawak.

Kelimpah ari nya, iya mega nerima penemuai basa Menteri Pengerai, Datuk Dr Adham Baba enggau sapit menteri nya Datuk Aaron Dagang di Wisma Bapa Malaysia, Kuching kemari.

Batang tuju penatai sida maya tu iya nya nerang pengawa ke diatur opis menteri nya nyengkaum pengawa nyaup nengeri Sarawak napi penyampau kes positif COVID-19 majak nambah ba nengeri tu.-EDISI UKAS

Share

add comment