Kepala Menteri Nerima Tiga Penemuai Basa

HARI LIMA, 16 APRIL 2021

KUCHING: Kepala Menteri Sarawak, Datuk Patinggi Dr Abang Abdul Rahman Zohari Tun Datuk Abang Openg nerima tiga penemuai basa ba opis iya di Wisma Bapa Malaysia, Kuching, kena Hari Empat.

Penemuai  keterubah ari Tuai Eksekutif Serakup Pengelikun Rama (PERKESO), Dato’ Sri Dr Mohammed Azman Dato’ Aziz Mohammed.

Dato’ Sri Dr Mohammed maya dirandau media madah, perintah nengeri udah setuju mayar urung 3,004 iku orang gawa perintah konterik ke bisi ngerejister nama ba Skim Jaga Perkeso.

“Pia mega, perintah nengeri udah setuju ngerejister enggau mayar semua tuai rumah enggau tuai raban bansa di nengeri Sarawak.

“RM4.16 juta iya nya ungkup orang gawa perintah konterik lalu nyauka setengah juta ungkup tuai rumah enggau tuai raban bansa,” ku iya.

Dato’ Sri Dr Mohammed nambahka jaku iya, raban sida udah meri urung RM1.296 billion ungkup rayat Sarawak lalu deka dibayar nengah gaji, insentif ngambi pengereja pengawa baru enggau meri bayar ngagai Skim Pengelikun Rama Gawa Kediri.

Udah nya, Kepala Menteri ngemataka pengawa nyuaka 10 projektor LED enggau skrin ngagai Gerempung Apai Indai Enggau Pengajar (PIBG) SMK Green Road ti disuaka Kaunsil Multimedia Sarawak (SMA).

Berebak enggau nya, Kepala Menteri ngarapka nembiak ba Sarawak ransing agi belajar ba pekara bekaul enggau Sains, Teknologi, Injinir enggau Matematik (STEM).

“Aku ngarapka nembiak ransing agi belajar ba pekara bekaul enggau STEM tu,” ku iya madah.

Nangkan ke nya, penemuai basa ketiga ari raban Tabung Haji diuluka Direktor Wilayah Sabah enggau Sarawak, Datin Nurlaila Saib.

Maya dirandau media, Datin Nurlaila nerangka pasal pemansang tusun atur pemadu baru ba Tabung Haji lebih agi ba Sabah enggau Sarawak.

“Ari tusun atur pemadu baru tu Kaunsil Tabung Haji ngarapka pengawa dikereja lebih agi ba Sabah enggau Sarawak lebih efisyen dikena nyungkak ekonomi raban Islam di Sarawak,” –EDISI UKAS

Share

add comment