Polis Mansik Kes Tipu Meri Servis ‘EnterSarawak’

HARI LIMA, 16 APRIL 2021

KUCHING: Polis DiRaja Malaysia (PDRM) Kontinjen Sarawak diatu benung mansik kes nipu ti bekaul enggau servis ngisi pom ‘enterSarawak’ ngagai mensia mayuh ti deka tama ke Sarawak enggau penyampau bayar RM130 siku.

Kepala Polis Sarawak, Dato Aidi Ismail ba penerang media kena Hari Empat madah, raban iya bisi nerima siti ripot polis bekaul enggau pekara nya.

“Polis bisi nerima siti ripot kena 12 April 2021 tu tadi bekaul enggau penerang ba ‘Facebook’, siku saspek madahka diri bisi meri servis ngisi pom ‘enterSarawak’ ngagai sapa ti deka tama ke nengeri Sarawak lalu bisi bayar RM130 siku.

“Saspek nya mega madah iya gawa enggau raban Komiti Penyangga Penusah Nengeri (JPBN) Sarawak lalu ulih meri pemendar ngagai orang ti ngisi pom nya.

“JPBN Sarawak nerang sida nadai kala nyiri tauka meri pemendar ngagai orang bukai ngarika sida ngereja pengawa nya,” ku iya.

Dato Aidi madah, polis diatu benung mansik kes tu ba Seksyen 420/511 Kanun Keseksaan iya nya pengawa nipu lalu ulih dijil enda kurang ari setaun enggau enda lebih ari 10 taun sereta dilunsin enggau tunggu.

Nya alai mensia mayuh ditangkan ngerejister ‘enterSarawak’ nengah chara ti engkeman lalu tau betanya terus ngagai Bilik Operasyen JPBN Sarawak bekaul enggau chara tama ngagai Sarawak ba lumur 082-443991. –EDISI UKAS

Share
0