Semua Sekula Ba Zon Mirah Di Sarawak Tutup Dua Minggu, PKPD Mengkang Dipejalai

HARI SATU, 19 APRIL 2021

KUCHING: Semua sekula nyengkaum tadika enggau prasekula ba Zon Mirah di Sarawak ditutup dalam kandang dua minggu berengkah Hari Dua (20 April 2021).

Kepala Menteri, Datuk Patinggi (Dr) Abang Abdul Rahman Zohari Tun Datuk Abang Openg madah, atur nya dipejalai bepun ari beberapa buah sekula bisi ngerikod kes kena rampit COVID-19 sebedau tu, kelimpah nangika ngerampit nembiak sekula, apai indai enggau pengajar.

“Aku meri jaku putus alai semua sekula ba zon mirah ditutup belabuh pagila (Hari Dua) laban bisi kes kena rampit ba sekula lalu dikenangi ngerampit ngagai bala apai indai, nembiak sekula enggau pengajar.

“Perintah Sarawak udah netapka pemutus nutup semua sekula ba zon mirah dikena kitai ngintu pengelikun enggau pengerai bala nembiak enggau rayat,” ku iya madah ba Aum Media Khas Atur Nerit SOP COVID-19 di Wisma Bapa Malaysia, kena Hari Satu.

Ba aum media ke sebaka, Kepala Menteri madah iya udah ngemendarka pengawa numbuhka Raban Penyanding Penemu COVID-19 Sarawak (SCOVAG).

Iya madah, tuju penumbuh SCOVAG tu dikena nentuka Komiti Penyangga Penusah Nengeri (JPBN) Sarawak nemu penerang ke pemadu baru bekaul enggau berita vaksin dunya, pengawa mansik kelimpah nyadi penyanding penemu ngagai perintah nengeri senentang vaksin ti engkeman ngagai rayat Sarawak lalu numbuhka Raban Pengatur Program Imunisasyen COVID-19 (CITF).

“Perintah Sarawak seruran besedia mantu nengah Pelin Imunisasyen Nasional dikena ngelengkaska pengawa nya.

“Aku udah meri pemendar ngagai Sarawak meli vaksin ke chukup lalu ngelengkaska pengawa imunisasyen ungkup rayat Sarawak,” pia ku iya madah baru.

Ku Kepala Menteri nambahka jaku iya, Menteri Teknologi enggau Sains Inovasyen, Khairy Jamaluddin deka nyukung pengeransing nembuka program vaksinasyen ba nengeri tu enggau bekal vaksin ti chukup.

Kelimpah ari nya, iya mega madah, JPBN Sarawak mengkang bejalaika Atur Mindah Betagang Diteritka (PKPD) bepun ari atur nya engkeman dipejalai sebedau tu ba rumah panjai, genturung pendiau enggau endur gawa.

Iya madah, perintah nengeri enda bejalaika Atur Bepekul tauka ‘lockdown’ nangika nyadi penanggul ngagai mayuh bengkah industri ti ngujungka mensia mayuh enda ulih gawa.

Iya nambahka jaku iya, ejensi baka PDRM, UKPN, ATM, APM enggau RELA mega diasuh neritka atur mindah ngagai pelilih bukai ti nyadi sebagi ari kebuah kes COVID-19 majak niki.

“Pengawa mindah entara pelilih menua mega siti ari kebuah ti besai kes COVID-19 ngelekai.

“Naka ke diatu, 506 kes positif enggau lapan kluster dirikodka nyadi bepun ari pengawa mindah ngagai pelilih bukai (Import C) kenyau ari bulan Januari 2021.

“Nya alai, berengkah ari seharitu, semina servis ti udah ditetapka aja dikemendar meraka zon ari pemendar polis,” ku Kepala Menteri.

Bela sama datai, Sapit Kepala Menteri, Datuk Amar Douglas Uggah Embas, Menteri Kaunsil Kandang Menua enggau Pengawa Berumah Sarawak, Dato Sri Prof. Dr. Sim Kui Hian, Sekretari Perintah Nengeri Sarawak, Datuk Amar Jaul Samion, Menteri Muda ba Opis Kepala Menteri (Pekara Islam enggau DBKU) enggau Menteri Muda Bekal Ai, Datuk Dr. Abdul Rahman Junaidi sereta Pesuruhjaya Polis Sarawak, Datuk Aidi Ismail. – EDISI UKAS

Share

add comment