ADUN Pakan Meri Bantu Kereban Ngubat Pesakit COVID-19 Ngagai Sepital Sarikei

HARI TIGA, 21 APRIL 2021

SARIKEI: Kaban Kunsil Nengeri (ADUN) Pakan, Tan Sri William Mawan Ikom udah datai meri bantu RM24,000 ngagai Sepital Sarikei dikena meli ‘High Flow Nasal Cannula Airvo 2’.

Kereban nya dikena nyaup sepital nya nambahka perengka guna ba Unit Siru Jaga (ICU) ngubat pesakit COVID-19.

Chek ungkup meli kereban tu disuaka Tan Sri William Mawan ngagai Direkter Sepital Sarikei, Dr Tey Chiew Chang, kena hari Tiga.

Iya ngarapka pemeri nya ngelempungka agi raban terabai menua lebih agi sida ke gawa ba Sepital Sarikei ngurangka pengelekai COVID-19 nyadi ba mensia mayuh.

Penyampau kes positif ke dirikod nyadi di sitak Sarikei, Pakan enggau Julau majak nambah ngujungka ICU di Sepital Sarikei bekenaka mayuh agi kereban ngubat pesakit positif.

Ba program bukai, Tan Sri William Mawan bela datai ngabas sereta ngemataka pengawa nyuaka Projek Transformasyen Menua Pesisir (RTP) nyemin jalai ba mua Rumah Enchangi, Sungai Dandi Ulu Pedanum, Pakan.

Projek RTP ADUN Pakan ti bekenaka ungkus RM100,000 nya udah berengkah digaga 15 Disember 2020 lalu mujur tembu 30 March tu tadi.-EDISI UKAS

Share

add comment