Komiti Khas Ditumbuh Dikena Ngelengkas Peminta Nyadi Peranak Menua

HARI EMPAT, 22 APRIL 2021

KUCHING: Komiti Khas Status Peranak Menua mujur ditumbuhka baru ari kerejasama Perintah Besai enggau Perintah Sarawak nengah pekara 15A Renggat Nengeri Sarawak.

Menteri Pengintu Pengelikun, Pengelantang Komuniti, Orang Indu Enggau Pemansang Nembiak Mit Sarawak,  Dato Sri Fatimah Abdullah ti mega Chairperson komiti nya madah, sida deka nyaup ngaduka peminta nyadi peranak menua.

“Pemutus nya udah ditetapka Opis Menteri Dalam Nengeri.

“Peminta nya semina ungkup nembiak mit ti nadai status peranak menua,” ku iya madah ba aum media di Kuching, kena Hari Tiga.

Iya mega madah, peminta meseti dianjung ngagai Opis Pengerejister Nengeri (JPN) Sarawak dikena ngaduka dokumen ke patut.

“Pekara ti ulih nyukung peminta nyadi peranak menua dikemendarka iya nya dokumen bekaul enggau endur nembiak mit nya diau ba nengeri Sarawak.

“Dokumen baka kad pengerai, setipikit sekula enggau ke bukai,” ku iya.

Nambahka nya, iya mega madahka bisi 101 iti peminta nyadi peranak menua ari taun 2019 ngagai 2020.

Kelimpah ari nya, iya madah, bisi lima bengkah pelilih menua ditentuka nyadi zon mirah nitihka pansik bekaul enggau penyalah bekenaka dadah enggau ‘substance’ kenyau ari bulan Januari nyentuk March 2021.

Lima bengkah pelilih zon mirah iya nya Kuching, Kota Samarahan, Sibu, Bintulu dan Miri. – EDISI UKAS

Share
0